Órt sóndirý salasynda 20 jyldan beri jumys isteımin - dıspetcher
AQTÓBE. QazAqparat - Órtke qarsy qyzmet dıspetcheri Aıjan Bıjanova shıraq qımyldap, tez sheshim qabyldaýdyń sheberi, dep habarlaıdy QazAqparat tilshisi.
Órt, sý sekildi tilsiz jaýmen kúresip, adamdarǵa kómek berýge asyǵatyn mamandyqty tańdaý úlken jaýapkershilikti talap etedi. Osy salany jón kórgen Aıjan Bıjanova Aqtóbe oblysy TJD Órt sóndirý qyzmeti, kúshter men quraldardy jedel basqarý ortalyǵynyń aǵa ınjeneri bolyp jumys isteıdi. Qazirgi kezde órt sóndirý qyzmetindegi jumys ótili 20 jyldan asty. Tájirıbeli tálimgerlerdiń arqasynda Aıjan Qýanyshqyzy mamandyqtyń ereksheligi men qyr-syryn tez meńgerip alǵan.
Búginde ol óz isiniń sheberi jáne jas mamandarǵa ózi tálimger bolyp júr. Ári «Órt sóndirý jáne avarııalyq-qutqarý jumystary qyzmeti» mekemesinde turmys qurdy. Qazir balasy Danııar Bısınbaev ana jolyn qýyp, Óńirlik oqý ortalyǵynyń qaraýyl bastyǵy qyzmetin atqarsa, kelini Áıgerim Bısınbaeva Aqtóbe qalasy №4 órt sóndirý bóliminiń radıotelefonshysy bolyp júr.
«Órt bolǵan saıyn men qatty ýaıymdaımyn. Biraq kez kelgen jaǵdaıda sabyrly bolýdy úırendik. Degenmen janyp jatqan úıde balalar men zeınetkerler bar ekenin bilsem mazasyzdanyp, bir habaryn alǵansha asyǵamyn. Keıde telefon arqyly adamnyń úreılenbeýin jáne úıden jyldam shyǵyp ketýin túsindiremin. Órttiń der kezinde sóndirilgenin bilgen sátte meniń qýanyshymda shek bolmaıdy», - deıdi dıspetcher.
Órtke qarsy qyzmettiń dıspetcheri - shuǵyl kómekke muqtaj adammen sóılesetin birinshi adam jáne qajetti nusqaýlar berip, qıyn jaǵdaıǵa tap bolǵandardy aman alyp qalatyn maman. Aıjan Qýanyshqyzy dál osy jaýapkershiligi joǵary mamandyqty tańdaǵanyna esh ókinbeıdi ári qutqarý jumystary sátti aıaqtalsa arqadan aýyr júk túskendeı bir serpilip qalady.
