Órt sóndirý qyzmetterine 2 myńnan astam arnaıy avtokólik qajet
ASTANA. 11 shilde. QazAqparat - Qazirgi kezde órt avtokólikteri parkiniń tozýy 55 paıyzǵa jetip otyr. Bul týraly búgin Astanada QR Tótenshe jaǵdaılar mınıstrliginiń ujymy men Májilis depýtattarynyń kezdesýi barysynda Órtke qarsy qyzmet komıtetiniń tóraǵasy Serik Áýbákirov málim etti.
Onyń sózine qaraǵanda, órt sóndirý qyzmetterindegi órt avtokólikteriniń parkinde 2 642 dana avtokólik tehnıkasy bar. Osy oraıda ol búginde atalǵan qyzmetter zamanaýı órt sóndirý tehıkasymen tolyǵyp otyrǵandyǵyn jetkizdi.
Sońǵy 7 jylda memlekettik satyp alýlardyń nátıjesi boıynsha mınıstrliktiń órtke qarsy qyzmeti 325 otandyq órt avtokólikterimen jasaqtaldy. «Jalpy osy merzimde órtke qarsy qyzmet bólimsheleri úshin 793 dana túrli maqsattaǵy órt sóndirý avtokólikteri satyp alyndy»,-dedi ol.
Kólikterdi satyp alý sharalary júrip jatqanyna qaramastan bul áli de jetkiliksiz. Qazirgi kezde órt avtokólikteri parkiniń tozýy 55 paıyzǵa jetken. «Búginde atalǵan avtokólikterge degen qajettilik 2 212 danany qurap otyr. Ol úshin 10 jyl merzimde órt tehnıkasymen kezeń-kezeńmen qamtamasyz etý turǵysynda jyl saıyn kem degende 5 mlrd. teńgege 215 avtokólik satyp alý qajet bolady», - dep túıindedi S. Áýbákirov.
