Órt sóndirý qyzmeti «kadrlyq ashtyqty» bastan keship jatyr - májilismen
ASTANA. QazAqparat - Depýtat Turǵyn Syzdyqov Parlament Májilisiniń jalpy otyrysynda órt sóndirýshilerdiń máselesin kóterdi, dep habarlaıdy «QazAqparat» HAA tilshisi.
Ol ІІM men UEM, Qarjy mınıstrligi basshylaryna depýtattyq saýal joldady.
«Tótenshe jaǵdaılar qyzmeti mamandarynyń erlikke para-par jumysy joǵary jaýapkershilikti talap etýmen shektelip qalmaýy kerek. Olar memlekettiń zor qoldaýyna muqtaj. Búgin órt sóndirýshilerdiń máselesin kótersek dep otyrmyz. Sońǵy 5 jylda resmı derekterge sáıkes, 70 myńǵa jýyq órt bolyp, 2 myńǵa jýyq adam tilsiz jaýdyń saldarynan qaıtys bolǵan. Bizdiń esepteýimizshe, atalǵan qyzmette júrgen adamdarǵa degen kózqarasty ózgertý kerek. Burynǵy kózqaras boıynsha adamdar áli de órt sóndirý qyzmetkerlerin «uıqydaǵy qyzmetkerler» dep oılaıdy. Bul túsinik azamattardyń sanasyn sińip qalǵan. Osynyń saldarynan bıýdjetti bólý kezinde atalǵan qyzmet eń sońǵy satyda qalady», - deıdi depýtat.
Májilismenniń aıtýynsha, órt sóndirý qyzmetinen kóptegen kadrlardyń ketip jatqany alańdatady.
«Jastar órt sóndirý qyzmetine jumysqa ornalasqannan keıin bir aıdan soń ketip qalyp jatady. Úmitker retindegi bir aılyq synaq merzimi, kásibı daıarlyq úshin oqý ornynda 2,5 aı oqý, odan keıin aıyna bar-joǵy 43 myń teńgege 3 aı boıy synaqta júrý - úmitkerlerge eshqandaı tańdaý qaldyrmaıdy», - deıdi ol.
Depýtattyń keltirgen málimetine súıensek, órt sóndirýshilerdiń baspana máselesi de sheshilmegen. Al áskerıler men polıtsııa qyzmetkerlerine beriletin kommýnaldyq tólemdegi jeńildik, tegin jol júrý TJ qyzmetkerlerinde qarastyrylmaǵan.
«Jas qyzmetkerlerge beriletin eńbekaqyny arttyrý, synaq merzimin qysqartý, jeńildikterdi qalypqa keltirýdiń mańyzy zor. Osy sharalar qolǵa alynsa, atalǵan salada kadrlyq «ashtyq» joıylyp, olardyń ımıdji arta túser edi. Olardyń materıaldyq-tehnıkalyq qamtylýy da kóńil qýantarlyq emes. Máselen, Qostanaıdaǵy TJD-da avtokóliktik shtaty normatıvke sáıkes 647 tehnıka bolýy kerek. Al qazirgi tańda onda bar-joǵy 149 ǵana. 2014 jyldan bastap 4 tehnıka ǵana jetkizilgen», - deıdi depýtat.
Májilismen osyndaı másele respýblıkadaǵy barlyq qalalar men aýdandardy mazalap otyrǵandyǵyn jetkizdi.
«Sol sebepti, jaýapty mınıstrlikte órt sóndirý qyzmetteri úshin kóliktik kásiporyn ashýdyń mańyzy zor. Ýaqtyly órt shyqqan jerge jetý qıyndyq týǵyzyp barady. Sol sebepti osy máselelerdi negizge alǵan durys dep oılaımyn», - dep túıdi Syzdyqov.
