Órt sóndirý-qutqarý sporty boıynsha X Álem chempıonatyndaǵy utysqa jeńil kólik tigilip otyr
ALMATY. QazAqparat - Almatyda 4-9 qyrkúıek aralyǵynda órt sóndirý-qutqarý sporty boıynsha ótetin X mereıtoılyq Álem birinshiliginiń ashylý saltanatynda kórermender arasynda uıymdastyrylatyn utysqa shaǵyn lıtrajdy avtokólik tigilip otyr.
Bul týraly búgin Almatyda ótken baspasóz máslıhatynda QR Іshki ister mınıstriniń birinshi orynbasary Vladımır Bojko málimdedi.
Onyń aıtýynsha, bul shara - órt sóndirýshi mamandyǵyn nasıhattaý jáne stadıonǵa kórermenderdi kóptep tartý maqsatynda jasalmaq.
«Sonymen qatar, kompıýter, noýtbýk, uıaly telefon sekildi kóptegen elektrondy tehnıkalar oınalady. Bul jerde uıymdastyrýshylar stadıonǵa keletinder arasynda tegin bıletter taratý, olardyń túbirtegin jınap, barabanǵa salyp oınatý jumystaryn tııanaqty atqarýy tıis» - dedi óz sózinde Vladımır Bojko.
Esterińizge sala keteıik, bıyl 9-12 tamyz aralyǵynda Taldyqorǵan qalasynda ótken respýblıkalyq chempıonattyń qorytyndysy boıynsha erler jáne áıelder arasynda ulttyq qurama komanda qurylǵan bolatyn. Qazir osy Álem birinshiligine qatysý úshin eki komanda oqý-jattyǵý jıynyn ótkizýde.
Almatynyń Ortalyq stadıonynda ótetin Álem birinshiligin kórermender tegin tamashalaıdy.
