Órt sóndirý kezinde qaza tapqan ınspektormen qoshtasý rásimi ótti - QR QOQM
ASTANA. 22 qazan. QazAqparat - Búgin Іle Alataýy memlekettik ulttyq tabıǵı saıabaǵynda oryn alǵan órtti sóndirý kezinde qaza tapqan ınspektor Pavel Maltsevpen qoshtasý rásimi ótti.
Bul týraly QR Qorshaǵan ortany qorǵaý mınıstrliginiń baspasóz qyzmetinen habarlady.
Qaraly jıynǵa QR Qorshaǵan ortany qorǵaý mınıstrligi orman jáne ańshylyq komıteti tóraǵasynyń orynbasary Qaırat Ústemirov qatysty. Ol QR Qorshaǵan ortany qorǵaý mınıstri Nurlan Qapparovtyń kóńil aıtý jedelhatyn oqyp berdi.
«QR Qorshaǵan ortany qorǵaý mınıstrliginiń ujymy jáne óz atymnan Sizge, jaqyn-týystarǵa Pavel Petrovıchtiń qazasyna baılanysty kóńil aıtamyn.
Sizdiń jubaıyńyz elimizdiń tabıǵı baılyqtary men basqa adamdardyń ómirlerin qorǵaý barysynda óziniń qyzmettik jáne azamattyq boryshyn oryndaý kezinde qaza tapty.
Onyń qyzmeti - óz isine jaýapkershilikpen qaraýdyń úlgisi. Otbasyńyz dýshar bolǵan aýyr qazaǵa ortaqtasyp, Sizben birge qaıǵyramyz»,- delingen mınıstr N. Qapparov joldaǵan jedelhatta.
Esterińizge salaıyq, P. Maltsev Іle Alataýy memlekettik ulttyq tabıǵı saıabaǵynda 20 qazan kúni bastalǵan órtti sóndirý kezinde aýyr jaraqattanǵan bolatyn. Jaralanǵan ınspektor dereý Almaty qalasynyń jedel járdem aýrýhanasyna jetkizildi, alaıda jaraqattardyń aýyrlyǵy saldarynan onyń ómirin saqtap qalý múmkin bolmady.
P. Maltsevtiń artynda zaıyby men eki balasy qaldy.
Oryn alǵan jaǵdaı boıynsha quzyrly organdardyń qyzmetkerlerinen arnaıy komıssııa qurylyp, bolǵan istiń anyq-qanyǵy anyqtalyp jatyr.
Qazaqstan Respýblıkasy zańnamasyna sáıkes, marqumnyń otbasyna materıaldy kómek kórsetiledi.
Ormandaǵy tilsiz jaýmen kúres sharalary jalǵastyrylyp jatyr. Kúnniń kúrt jylynýy, qatty jel jáne janyp jatqan ormannyń taýly jerde ornalasqany órtpen kúresý barysynda kóp qıyndyqtar týǵyzyp otyr.
«Qazavıaormanqorǵaý» respýblıkalyq memlekettik kommýnaldyq kásipornynyń dıspetcherlik qyzmetiniń málimetteri boıynsha, órtpen kúreske Almaty qalasynyń qutqarý qyzmetiniń, qorǵanys jáne tótenshe jaǵdaılar jónindegi mınıstrlikterdiń 4 tikushaǵy jumyldyryldy.
Sonymen qatar, tilsiz jaýmen Іle Alataýy memlekettik ulttyq tabıǵı saıabaǵynyń, tótenshe jaǵdaılar jónindegi mınıstrliktiń jáne «Qazavıaormanqorǵaý» kásipornynyń 182 qyzmetkeri kúresip jatyr.
22 qazan kúngi saǵat 11.00-degi jaǵdaı boıynsha, orman órti 7 ga alqapty alǵan.
