Órt shyǵyp, adamdar ajal qushqan «Haıvıl» smart-páterleriniń quny qansha
ASTANA. QazAqparat - Astanadaǵy «Haıvıl» elıtaly úıinde bolǵan qaıǵyly jaǵdaı men birneshe ret qaıtalanǵan órtke baılanysty «QazAqparat» HAA tilshisi smart-páterlerdiń qunyn surastyryp bilgen edi.
Satý bóliminiń habarlaýynsha, «aqyldy úı» tujyrymdamasynda eń aldymen qaýipsizdikke mán berilgen. Keńesshi derekterine sáıkes, kireberister, alańqaılarda jáne lıftilerde - barlyq jerge beınekameralar ornatylǵan. Páterlerde smart-domofon jumys isteıdi, ol arqyly balalar alańqaıynda oınap júrgen búldirshinderdi baqylaýǵa bolady. Sondaı-aq, bul úı qozǵalys datchıkteri negizindegi «aqyldy» jaryqtandyrýmen jabdyqtalǵan. Kireberiste de, páterlerde de órt dabyly jedel habar beredi. Odan bólek elektr energııasy men sýdyń avtonomdy generatory bar. Apatty jaǵdaı bolǵanda, bir táýlikke jeterlik sý kózin paıdalanýǵa bolady.
Ázirge daıyn páterler «Haıvıl park» (4 bólmeli) jáne «Haıvıl Astana» (G blogynda jalpy aýdany 70 sharshy metr bolatyn 2 bólmeli páterler) keshenderinde ornalasqan. 100 paıyzdyq tólem jaǵdaıynda «Haıvıl Astana» páteriniń bir sharshy metriniń quny 480 myń teńgeni quraıdy.
«Haıvıl park» páterleriniń aýdany 75-ten 123 sharshy metrge deıin jetedi. Al «Haıvıl Astanada» 355 sharshy metr bolatyn 7 bólmeli páterler de bar.
Páter habarlandyrýlary ornalasqan saıttarda atalǵan turǵyn úı keshenderiniń páterleri 36 mıllıon teńgeden bastap, 455 mıllıon teńgege deıingi aralyqta satylyp jatyr.
Eske sala ketsek, 14 shilde kúni «Haıvıl» turǵyn úı kesheniniń D blogyndaǵy páterden órt shyǵyp, 4 adam qurban boldy. Keıinirek, Astana ІІD qurban bolǵandar - 1953 jyly týǵan Nıgerııa azamaty, onyń zaıyby - 1963 jyly týǵan Ulybrıtanııa azamatshasy, 8 jáne 17 jastaǵy kámeletke tolmaǵan balalar ekeni anyqtady. Er adam Nazarbaev Ýnıversıtetiniń qyzmetkeri bolǵan. Aldyn ala boljam boıynsha, órt jelilerdiń tuıyqtalýynan tutanǵan. Biraq, ІІM Tótenshe jaǵdaı komıtetiniń habarlaýynsha, órt sebepteri týraly aıtýǵa áli erte, qazirgi ýaqytta sáıkes saraptamalar júrip jatyr.
6 shilde kúni de «Haıvıl» turǵyn úı kesheniniń A blogyndaǵy ǵımarattardyń biri órtengen. Tilsiz jaýdy 17 dana tehnıka men 35 adam 20 mınýtta sóndirgen edi. Qaza tapqandar men zardap shekkender bolǵan joq.
Al 19 aqpan kúni turǵyn úı keshenindegi órtten 150 adam, onyń ishinde 50 bala evakýatsııalandy. Bir adam órt tútininen zardap shekti. Oqıǵa ornynda 8 dana tehnıka men astanalyq órt sóndirý qyzmetiniń jeke quramynan 35 adam jáne «102» polıtsııa qyzmeti men «103» qyzmetiniń brıgadasy jumyldyryldy.
«Haıvıl» turǵyny Anardyń aıtýynsha, birneshe ret qaıtalanǵan órt oqıǵalarynan keıin «aqyldy» úıdiń júıesine degen senim azaıdy.
«Degenmen munda turý rasymen de yńǵaıly»,-deıdi Anar.
Úıde páter ıelerimen qatar ýaqytsha páter jaldaýshylar da turady.
