Órt sharpyǵan aýmaqtyń aýdany 300 sharshy metrdi qurady
ASTANA. Mamyrdyń 12-si. QazAqparat /Rýslan Ǵabbasov/ - Jańa balabaqsha ǵımaratyndaǵy órt dánekerleý jumystarynyń saldarynan bolǵan. Bul týraly búgin oqıǵa ornynda órt sóndirý qyzmetiniń ókilderi aıtty,
dep habarlaıdy QazAqparat oqıǵa ornynan.
Olardyń aıtýynsha, qazirgi kezde órttiń bir bóligi aýyzdyqtaldy. «Atap aıtqanda, órtti aýyzdyqtaýda belgili bir problemalar týyndap otyr. ıAǵnı, bul mańaıda órtti sóndirýge arnalǵan sý gıdranttary bar. Alaıda, ondaǵy sýdyń qysymy tómen. Sondyqtan sý birshama jetispeı tur», deıdi qyzmetkerler.
Olardyń sózine qaraǵanda ǵımarattaǵy jumysshylardyń arasynan zardap shekkender joq. Ǵımarattaǵy negizgi qaýip tóndirgen eki kıslorod ballony men bir karbıt bóshkesi syrtqa shyǵarylǵan. Ǵımarattyń jalpy aýdany 1400 sharshy metrdi quraıdy. Buǵan deıin bul ǵımaratta áskerı komıssarıat jumys istegen. Keıinnen bul nysan elordanyń bilim basqarmasynyń ıeligine berilip, ony balabaqshaǵa aınaldyrý úshin kúrdeli jóndeý jumystary júrgizilip jatqan edi. Saryarqa aýdanynyń ákimi Sabıra Mustafınanyń aıtýynsha, 240 balaǵa arnalǵan bul balabaqsha bıylǵy jyly maýsymnyń 25-inde tapsyrylýy tıis edi. Qazirgi kezde órtti sóndirý úshin 8 arnaıy tehnıka jumyldyrylyp otyr. Órt sharpyǵan aýmaqtyń aýdany 300 sharshy metrdi qurady.
Atap aıtqanda, bul qurylys nysanynda qazirgi kezde qalanyń órt sóndirý qyzmetteri jumyldyrylǵan. Bul balabaqsha Zataevıch kóshesi boıynda, ıaǵnı K. Baıseıitova atyndaǵy opera jáne balet teatrynyń mańynda ornalasqan.
