Órt saldarynan úılerinen evakýatsııalanǵan balalar jazǵy lagerlerde tegin demalýda – Abaı oblysy
Semeı qalasy ákimdiginiń málimetinshe, tótenshe jaǵdaıǵa baılanysty Borodýlıha aýdany Polovınka, Talıtsa jáne Bulaq aýyldaryndaǵy úılerinen ketýge májbúr bolǵan balalarǵa jazǵy lagerlerde tegin demalys uıymdastyrylýda. Qazir olardyń barlyǵy Semeıdegi evakýatsııalyq pýnktterde. Olarǵa barlyq qajetti kómek kórsetilip jatyr.
Evakýatsııalanǵan balalardyń bos ýaqytyn tıimdi uıymdastyrý úshin kún saıyn Abaı mýzeıine, basqa da qalalyq murajaılarǵa, bıologııalyq ortalyqqa, kınoǵa, ortalyq saıabaqqa ekskýrsııalar ótkizilýde.
«Kún saıyn balalar úshin demalys jáne oıyn-saýyq baǵdarlamalary ázirlenýde. Sondaı-aq balalarǵa arnalǵan №49 orta mektep bazasynda mektep lageri jumys istep tur. Onda bilim berý sabaqtarymen qatar olarǵa psıhologııalyq qoldaý kórsetilýde», - deıdi evakýatsııalyq pýnkt ókili Birjan Býlabaev.
Qazirgi tańda Semeıdegi evakýatsııalyq pýnktterde 189 adam, onyń ishinde 74 bala bar. Jalpy, qalada 800 adamǵa arnalǵan 9 pýnkt ázirlendi. Úılerinen kóshirilgen turǵyndar múlkiniń saqtalýyn quqyq qorǵaý organdary qadaǵalaıdy.
