Órt saldarynan 321 adam qaza tapty, olardyń 37-si balalar - TJM
ASTANA. 12 qazan. QazAqparat - Bıylǵy 9 aıdyń ishinde Qazaqstan Respýblıkasynda 11822 órt oqıǵasy tirkelip, olardyń saldarynan bolǵan materıaldyq shyǵyn 3 mlrd. teńgeden asyp tústi.
Órtte 321 adam qaza tapty, olardyń 37-si - kishkentaı balalar, jaraqat alyp, kúıikke shaldyqqandar sany - 412.
Bul týraly búgin QR Tótenshe jaǵdaılar mınıstrliginde ótken brıfıngte QR TJM Órtke qarsy qyzmet tóraǵasynyń orynbasary Dáýren Danaev málimdedi.
Onyń aıtýynsha, bul rette bıyl órtte 1527 adam men jalpy somasy 49 mlrd. astam teńgege materıaldyq múlik qutqaryldy.
Taldaý jumystary kórsetkendeı, órttiń basym bóligi, ıaǵnı 68 paıyzy turǵyn úı sektorynda oryn alǵan. Turǵyn úı sektorynda bolǵan 7881 órttiń 58 paıyzy qalalyq jerlerde bolsa, 42 paıyzy aýyldyq jerde oryn alypty.
«Kúzgi-qysqy maýsymdarda turǵyn úı sektorynda, atap aıtsaq, qala shetindegi saıajaılarda órt kóptep shyǵady. Óıtkeni adamdar pesh jaǵý kezinde, nemese túrli jylytý qondyrǵylaryn qoldaný kezinde qatelikterge boı aldyrady», - deıdi D. Danaev.
Onyń aıtýynsha, pesh jaqqan kezde tútin shyǵatyn qubyrdy múldem jabýǵa bolmaıdy. óıtkeni jabyq qubyrdan shyqqan ýly gaz bólmege taralady. Óńi de, ısi de joq ýly gazben adam birneshe ret tynys alsa, esinen tanady, tipti ólip te ketýi múmkin. Respýblıka boıynsha ýly gazben ýlaný nátıjesinde 83 adam kóz jumǵan.
Sondaı-aq, elektr jabdyqtaryn montajdaý jáne tehnıkalyq paıdalaný erejelerin saqtamaý da qaıǵyly oqıǵaǵa dýshar etedi. «Órt shyǵýdyń taǵy bir sebebi - otpen abaısyz bolý», - dep atap ótti D. Danaev. - Temeki tartý kezinde terezeden nemese balkonnan sóndirilmegen temeki tuqylyn, sirińkeni tastaý, sharýashylyq qurylystaryna jaqyn jerlerde alaý jaǵý, sondaı-aq, bala-shaǵany qaraýsyz qaldyrý sııaqty jaýapsyz is-áreket te úlken órtke, qaıǵyly oqıǵaǵa alyp keledi».
