Órt pen sýdan qoryqpaǵan OQO-nyń jas qutqarýshylary marapattaldy
ShYMKENT. QazAqparat - Ońtústik Qazaqstan oblysynda turǵyndardy órt pen sýdan aman alyp qalǵan jas qutqarýshylar marapattaldy. Olardyń úsheýine «Erligi úshin» medaldar, taǵy ekeýine gramotalar men baǵaly syılyqtar tabystady, dep habarlaıdy QazAqparat tilshisi.
Oblystyq Tótenshe jaǵdaılar departamentinde uıymdastyrylǵan saltanatty sharada balalar men eresekterdi órtten qutqaryp, erlik jasaǵan qazirgi zamannyń batyrlaryna erekshe qurmet kórsetildi. Atap aıtqanda, Dmıtrıı Kaıýrın, Nurbek Taýkeev pen Іlııas Úrkimbaevtarǵa «Erligi úshin» medaldary, sondaı-aq alǵys hattar tabystaldy. 
Budan bólek, Ǵ.Muratbaev atyndaǵy №23 orta mektep oqýshysy Demejan Altaıǵa jáne Shymkent qalasy «Bolashaq» kolledjiniń 1-kýrs stýdenti Nurman Álibaevqa gramotalar men baǵaly syılyqtar berildi.
Aıta ketsek, Altaı Demejan 2017 jylǵy 9 sáýirde shamamen tańǵy saǵat 10.00-de «Kókmoıyn» aryq arnasyna batyp bara jatqan balany baıqap qalǵan. Oılanbastan tereńdigi 2 metr bolatyn kanalǵa túsip, aǵyp bara jatqan 1,5 jasar Nurdillá Erjandy jaǵaǵa alyp shyqqan bolatyn. Búldirshinge alǵashqy medıtsınalyq kómek kórsetip, onyń ómirin qutqaryp qalǵan edi.
Al Saryaǵash aýdanynda turatyn stýdent Nurman Álibaev ótken jyly 15 maýsymda «Keles» ózeniniń boıynda ornalasqan aǵasynyń úıine qonaqqa barǵan. Ol dalada júrgen kezde shomylyp júrgen qyzdardyń «Arýjan sýǵa aǵyp bara jatyr» degen daýystaryn estigen. Ózenge júgirip kelgen jigit 14 jastaǵy qyzdyń sýǵa aǵyp bara jatqanyn kóredi. Jasóspirimniń denesi sýdan birese kórinip, birese batyp bara jatqan. Onsyz da aǵysy qatty ózenniń eni 15 metr, tereńdigi 3-4 metr bolǵandyqtan eshkim qutqarýǵa bata almaǵan. Osy kezde Nurman ózenniń aǵysymen júzip baryp, qyzdyń kıiminen ustap alǵan. Sodan jaǵaǵa alyp shyqqan edi. Arýjannyń ókpesi sýǵa tolyp, demi toqtap qalǵan bolatyn. Nurman saspastan, qyzǵa alǵashqy medıtsınalyq kómek kórsetken. Osylaısha ómirin qutqaryp, shaqyrtylǵan jedel járdemniń dárigerlerine tabystaı aldy.
