Órt oqıǵalarynyń basym kópshiligi astyq óndiretin aımaqtarda oryn alýda - Aýyl sharýashylyǵy mınıstrligi
ASTANA. Mamyrdyń 5-i. QazAqparat /Aıdar Ospanalıev/ - «Bıylǵy jyly qoldan jasalǵan órt oqıǵalary oryn alǵan joq», dep málimdedi búgin Aýyl sharýashylyǵy mınıstrliginiń Orman jáne ańshylyq sharýashylyǵy komıtetiniń tóraǵasy Erlan Nysanbaev jýrnalıstermen bolǵan baspasóz máslıhatynda,
dep habarlaıdy QazAqparat.
Onyń sózine qaraǵanda, eldegi órt oqıǵalarynyń 70 paıyzy dalada bolatyn órtterden shyǵady. Ol birinshi kezekte dalada ósip turǵan jáne qýraǵan shópti órteýmen baılanysty. «Sondyqtan qalyń kópshilik osyndaı áreketterden aýlaq bolǵany jón, bizdi durys túsinip, durys kózqaras tanytady degen oıdamyn. Sebebi Qazaqstanda ormandy alqap sonshalyqty úlken emes. Sondyqtan qazir qolda bardyń ózin saqtap, keıingi urpaqqa jetkizý biz úshin mańyzdy is bolýy tıis», dedi komıtet tóraǵasy.
Onyń sózine qaraǵanda, elimizde órt oqıǵalarynyń sany jyldan jylǵa kemip otyr. Mysaly 2008 jyly órt oqıǵalarynyń sany 901-di qurasa, jalyn sharpyǵan aımaq 7myń 728 gektarǵa jetken. 2009 jyly órt oqıǵalary 529-dy, órtengen aımaq 4 myń 368 gektar bolǵan. «Bul oraıda aıta ketetin másele, elde bolatyn órt oqıǵalarynyń basym kópshiligi astyq óndiretin aımaqtarda oryn alyp otyr. Óıtkeni bul aımaqtardy óte kóp mólsherde bıdaıdyń sabanyn órteıdi. Osyǵan baılanysty biz barlyq aımaqtyq ınspektsııalarǵa jergilikti ákimshiliktermen birlese otyryp, sabandy órteý jumystaryn qadaǵalaý jóninde tıisti sharalar qoldanýdy talap etip otyrmyz», dedi E.Nysanbaev.
