Órt lıft shahtasynan shyqqan joq - Qaýymdastyq prezıdenti Almatydaǵy órt týraly

ALMATY. QazAqparat - Qazaqstan lıftshileri ulttyq qaýymdastyǵynyń prezıdenti Erjan Igibaev «Aqkent» shaǵynaýdanyndaǵy 16 qabatty úıdegi órt lıft shahtasyndaǵy kabelderdiń tutanýy saldarynan shyqqan degen aqparatty joqqa shyǵardy, dep habarlaıdy QazAqparat tilshisi.

«Keshe BAQ-ta «Aqkent» turǵyn úı keshenindegi órt lıft shahtasyndaǵy kabeldiń qysqa tuıyqtalýynan shyqty degen aqparat tarady. Búgin biz Qazaqstan lıftshileriniń ulttyq qaýymdastyǵy retinde oqıǵa ornyna keldik. Anyqtalǵandaı, lıft shahtasy órt oshaǵy emes, lıft jabdyqtary qalypty jumys istep tur», - deıdi Erjan Igibaev.

Aıtýynsha, órttiń sebebi basqa jerde jatyr. Bul - aspaptyq qorapta ornalasqan negizgi elektr kabelindegi qysqa tuıyqtalý.

«Sondyqtan másele lıft jabdyqtarynyń ózinde dep aıtý qate. Bul - aldyn ala boljam. Biz ázirge eshteńe aıta almaımyz, óıtkeni belgili bir saraptamalar júrgizilýi kerek. Osydan keıin onyń naqty sebebi belgili bolady. Biraq lıft shahtasy men lıftilerdiń bul oqıǵaǵa esh qatysy joq dep aıta alamyn», - dedi ol.

Spıker búkil úılerde kabınalyq lıftiler otqa tózimdi bolýy kerek dep esepteıdi.

Ol maman retinde qurylys salýshylarǵa jańa úılerdiń qurylysynda otqa tózimdi esikterdi paıdalanýdy usynady.

Onyń aıtýynsha, bul normalardy qurylys kompanııalary saqtaı bermeıdi.

Erjan Igibaev Almatydaǵy turǵyn úılerdegi lıftilerdiń 70 paıyzy órt qaýipsizdigi sharalaryna saı kelmeıtinin aıtty.

Ol kóp úılerde otqa tózimdi emes, qarapaıym esik ornatylǵanyn aıtty.