Órt kezinde joldy bógegen kólikti zaqymdaýǵa ruqsat berý kerek pe - TJM túsindirmesi

Vedomstvonyń habarlaýynsha, áleýmettik jelilerde Túrkistan kóshesindegi «Kórkem-3» turǵyn úı kesheninde bolǵan órt kezinde órt sóndirýshiler áreketsizdik tanytty jáne joldy bógep turǵan kólikti 20 mınýt boıy joımaǵan degen aqparat shyndyqqa sáıkes kelmeıdi.

TJM málimetinshe, órt sóndirý bólimsheleri oqıǵa ornyna bara jatqan kezde-aq janyp jatqan páterdiń terezesinen qoıý tútin men jalyn anyq baıqalǵan. Bul órttiń kesh anyqtalǵanyn kórsetedi.

Sondaı-aq pandýs kireberisinde turǵan jeńil avtokólik tek bıiktikte jumys isteıtin tehnıkanyń aýlaǵa kirýine ishinara kedergi keltirgenimen, órt sóndirýshilerdiń negizgi is-qımyldaryn júzege asyrýǵa tosqaýyl bolmaǵan.

- Oqıǵa ornyna alǵashqy bólimsheler kelgen sátten bastap gaz-tútinnen qorǵaý qyzmetiniń býyndary adamdardy qutqarý jáne órtti sóndirý jumystaryn jedel uıymdastyrdy. Qutqarýshylar avarııalyq-qutqarý quraldaryn, sondaı-aq órt sóndirýge arnalǵan jyljymaly aspaly qondyrǵylardy qoldandy. Sonymen qatar ishki órtke qarsy sý qubyry júıesi arqyly jeń jelileri tartylyp, keıin kelgen bólimsheler avtotsısternalardan qosymsha jelilerdi jaıdy.

Qabyldanǵan sharalardyń nátıjesinde janyp jatqan páterden bir áıel qutqarylyp, órttiń joǵary qabattarǵa taralýyna jol berilmedi. Alaıda órt sóndirýshiler kelgenge deıin páterdiń tolyq janýy jáne ýly gazdyń taralýy qaıǵyly saldardyń aldyn alýǵa múmkindik bermedi, - dep túsindirdi TJM-nan.

Mınıstrlik órt sóndirýshilerdiń 20 mınýt boıy áreketsiz bolǵany týraly aqparattyń shyndyqqa janaspaıtynyn atap ótti.

Sonymen qatar TJM Qazaqstan Respýblıkasynyń «Azamattyq qorǵaý týraly» zańynyń 63-babyna sáıkes órt sóndirýshiler órtti joıý barysynda keltirilgen zalal úshin jaýapkershilikten bosatylatynyn eske saldy. Bul norma qajet bolǵan jaǵdaıda esik, tereze, shatyr jáne basqa da konstrýktsııalardy ashýǵa múmkindik beredi. Alaıda avtokólikterdi ádeıi tas-talqan etýge ruqsat beretin naqty quqyqtyq norma qarastyrylmaǵan.

Mınıstrlik mundaı normany engizý birqatar quqyqtyq jáne praktıkalyq táýekelderge ákeletinin atap ótti.

Birinshiden, tótenshe jaǵdaılardyń árqaısysy jeke sıpatta bolatyndyqtan, kólikti ádeıi zaqymdaý qajettiligin aıqyndaıtyn ámbebap ólshemderdi belgileý múmkin emes. Bul normanyń engizilýi teris paıdalanýǵa nemese sheshim qabyldaýdyń keshigýine ákelýi yqtımal.

Ekinshiden, mundaı tásil jaýapkershilik máselesinde quqyqtyq belgisizdik týdyrady. Sheshim shuǵyl jaǵdaıda qabyldanady, al onyń zańdylyǵyna keıin baǵa beriledi, bul naqty qyzmetkerge shamadan tys jaýapkershilik júkteýi múmkin.

Úshinshiden, keltirilgen zalal úshin jeke jaýapkershilik táýekeli jedel áreket etýge kedergi keltirip, azamattardyń ómiri men densaýlyǵyna qaýip tóndirýi yqtımal.

Tórtinshiden, mundaı normanyń engizilýi sot daýlarynyń kóbeıýine, bıýdjetke qosymsha júkteme túsýine jáne qoǵamda teris pikir qalyptasýyna ákelýi múmkin.

TJM tájirıbede quqyq qorǵaý organdarymen ózara is-qımyldyń naqty algorıtmi bar ekenin atap ótti. Polıtsııa órt sóndirýshilermen birlesip shaqyrtýlarǵa shyǵyp, jolǵa kedergi keltiretin kólikterdi evakýatsııalaýdy qamtamasyz etedi.

Mınıstrlik sondaı-aq gıpotetıkalyq jaǵdaılardy mysalǵa keltirdi. Máselen, órt qaýpi tómen jaǵdaıda (mysaly, as ázirleý kezinde taǵamnyń kúıip ketýi) kólikke zııan keltirilýi múmkin, al onyń saldary keltirilgen zalal men aldyn alynǵan qaýip arasynda sáıkessizdik týǵyzady. Bul óz kezeginde azamattardyń shaǵymdaryna, sot daýlaryna jáne qoǵamdyq rezonansqa alyp kelýi yqtımal.

Osyǵan baılanysty TJM órt sóndirý tehnıkasyna jol ashý úshin avtokólikterdi ádeıi zaqymdaýǵa ruqsat beretin normany zańnamaǵa engizý qajetti emes jáne júıelik táýekelderge baılanysty qoldaýǵa jatpaıtynyn málimdedi.

Aıta keteıik, buǵan deıin órt qaýipti kezeńde qandaı talaptardy qatań saqtaý qajet ekeni habarlandy.