Órt kezinde erlik kórsetken oqýshy qyz marapattaldy
NUR-SULTAN. QazAqparat - Nur-Sultan qalasynyń bilim basqarmasy turǵyn úıdegi órt kezinde adamdardy evakýatsııalaýǵa kómek kórsetken №5 mektep-gımnazııasynyń 10-synyp oqýshysy Nıkol Savchenkony alǵys hatpen marapattady. Bul jóninde qala ákiminiń resmı saıtyna silteme jasap QazAqparat habarlaıdy.
12 aqpanda Kúıshi Dına kóshesi, 39/1 úıden órt shyqty. Bul úıde turatyn Nıkol Savchenko batyldyq tanytyp, jedel járdem brıgadasy kelgenge deıin kúıiktermen evakýatsııalanǵan turǵyndarǵa alǵashqy medıtsınalyq kómek kórsetti.
Oqıǵany kórgen qyzdyń anasy Vıktorııa Paktyń aıtýynsha, Nıkoldiń kómeginen keıin turǵyndar úreıin jeńip, sabyrǵa kelgen.
«12 aqpanda biz turatyn úıden órt shyqty. Nıkol ekeýmiz sol ýaqytta sabaqtan kelgen edik. Mashınany turaqqa qoıyp jatqanda jarylysty estidim. Munyń bári bizdiń kóz aldymyzda boldy. Men páterde qalǵan anama qońyraý shaldym, Nıkol oǵan órt kezinde ózin qalaı ustaý kerektigin túsindirip, nusqaý bere bastady. Bul nusqaýlar anamyzǵa kómektesti. Sodan soń men qutqarý qyzmetine telefon soqtym, Nıkol zardap shekkenderge kómektesti. Ózge eresekter telefonyna órt vıdeosyn túsirip jatqanda, Nıkol zardap shekken kórshileriniń jarasyn tańyp, tótenshe jaǵdaı kezinde ne isteý kerektigin túsindirip jatty. Sondaı-aq ol stressti jeńe almaǵandarǵa psıhologııalyq kómek kórsetti», - deıdi Vıktorııa Pak.
Kórshileri de Nıkoldi árqashan kómekke kelýge daıyn, qarapaıym, meıirimdi qyz retinde sıpattaıdy.
«Biz Nıkoldiń ájelerdiń aýyr sómkesin kóterip, qarııalarǵa esik ashyp, jol bergenin únemi kóremiz. Sol ýaqytta men bul qyzdyń óz isine jaýapty, meıirimdi ekenin kórdim. Órt bolǵan kúni Nıkol júgirip, aınalasyndaǵylardyń bárine kómektesip júrdi. Men onyń batyldyǵy men erligine tańǵaldym. Nıkol sııaqty qyzdar - elimizdiń maqtanyshy. Biz ony maqtamaımyz, biz ony maqtan tutamyz. Ol osyǵan laıyq», - deıdi Nıkoldiń kórshisi Gúldana Qodanova.
Nıkoldiń aıtýynsha, tótenshe jaǵdaı kezindegi onyń áreketin erekshe dep aıtýǵa kelmeıdi. Ol alǵashqy kómek kórsetý daǵdylaryn «Qyzyl Jarty aı» jáne «Qazaqstan Respýblıkasynyń Qyzyl Kresi» halyqaralyq uıymdarynda meńgerdi.
Sonymen qatar, Nıkol tótenshe jaǵdaılar departamentiniń qyzmetkerlerimen birge qala turǵyndaryna sý, muz jáne órt kezindegi qaýipsizdik erejelerin túsindiredi. Bilim men daǵdylar arqyly Nıkol tótenshe jaǵdaıda durys áreket etti.
Nıkol mekteptiń qoǵamdyq ómirine belsene atsalysady. Ol oqýshylarǵa «Jedel járdem» jáne «Salaýatty ómir salty» sabaqtaryn tegin ótkizedi. Bos ýaqytynda «Astana» klýbynda ústel tennısimen aınalysady. Aǵylshyn jáne nemis tilderin jetik meńgergen qyz esep shyǵarǵandy, mýzykalyq aspaptarda oınaǵandy unatady.
Sondaı-aq Nıkol úıdiń aýlasynda senbilik uıymdastyryp, panasyz janýarlardy ýaqytsha ustaý oryndaryna ornalastyrady.
