«Órt qaıta órshidi»: TJM Abaı oblysy mańyndaǵy qoıý tútinge túsinik berdi

ÓSKEMEN. QazAqparat – QR Tótenshe jaǵdaılar mınıstrligi Abaı oblysy Shúlbi kentiniń mańyndaǵy qoıý tútinge qatysty jaýap berdi, dep habarlaıdy QazAqparat tilshisi.

Búgin Telegram-arnalardyń birinde Abaı oblysynda órt qaıta órship, Shúlbi kentiniń mańyn qoıý tútin basqany jaıly vıdeo tarady.

Osyǵan baılanysty Tótenshe jaǵdaılar mınıstrliginiń baspasóz qyzmeti jaýap berdi: «Vıdeo Shúlbi kentiniń mańynda túsirilgen. Bul jańadan shyqqan órt emes. Oqshaýlanǵan órtti sóndirý jumystary júrgizilip jatyr. Qazirgi jaǵdaıdy eskere otyryp, kúshter men quraldar qaıta toptastyrylǵan. Tótenshe jaǵdaılar mınıstri sol jaqta júr. Jaǵdaı tolyǵymen baqylaýda», - dep habarlady mınıstrliktiń baspasóz qyzmetinen.

Vedomstvo dereginshe, órttiń oqshaýlanýy – bul órtti sóndirý satysy.

«Osy kezde eldi mekenderge qaýip tónbeıdi, órttiń taralýy toqtatylady jáne qolda bar kúshter men quraldar ony tolyqtaı sóndirýge jumyldyrylady. «Semeı orman» tabıǵı rezervaty aýmaǵynda tabıǵı órt tolyq óshirilgenge deıin turaqty túrde aerovızýaldy baqylaý júrgizilýde», - delingen aqparatta.

Eske salaıyq, «Semeı ormany» tabıǵı rezervaty aýmaǵyndaǵy órt 8 maýsymda tutanǵan bolatyn. Saldarynan otpen kúreske jumyldyrylǵan 14 ormanshy qaza boldy.

14 maýsymda órttiń taralýy toqtatyldy.

15 maýsym kúni Tótenshe jaǵdaılar birinshi vıtse-mınıstri Ibragım Kúlshimbaev órt 4-5 kúnde aýyzdyqtalýy múmkin ekenin aıtty.