Órt qaýipti maýsymda 4 244 adam ákimshilik jaýapkershilikke tartyldy - TJM
ASTANA. KAZINFORM – Elimizde órt qaýipti kezeń bastalǵaly beri 499 orman órti, 25 dala órti jáne 1 982 qurǵaq shóptiń janý deregi tirkeldi, dep habarlaıdy Tótenshe jaǵdaılar mınıstrligi.
Qaýiptiń aldyn alý maqsatynda orman-dala alqaptarynda reıdter men patrýldeý júrgizilýde. Bul jumysqa azamattyq qorǵaý, ishki ister, tabıǵatty qorǵaý jáne orman sharýashylyǵy mekemeleri men jergilikti atqarýshy organdardyń qyzmetkerleri qatysyp jatyr. Osy kezeńde 13 myńnan astam reıd ótkizilip, órt qaýipsizdigi erejelerin buzǵan 4 244 adam ákimshilik jaýapkershilikke tartyldy.
- Jergilikti atqarýshy organdar tabıǵatty qorǵaý mekemelerimen birlesip 360 órt-taktıkalyq oqý-jattyǵý uıymdastyrdy. Sharýashylyq sýbektileri men turǵyndar arasynda 4 407 jıyn, 2 230 dóńgelek ústel ótkizilip, 55 496 nusqama berildi. Jalpy túsindirý jumystary 342 myńnan astam adamdy qamtydy, - delingen vedomstvo aqparatynda.
TJM táýlik boıy órt jaǵdaıyna monıtorıng júrgizip otyr. Orman alqaptary bar óńirlerde áýe kemeleriniń kezekshiligi qoıylyp, ushqyshsyz ushý apparattary tartylǵan, sondaı-aq órt beketteri jasaqtalǵan.
Mınıstrliktiń dereginshe, orman-dala órtteriniń negizgi sebepteri – sóndirilmegen ot, temeki tuqyldary men sirińke, otty abaısyz paıdalaný, qoqys pen shópti ruqsatsyz jaǵý, sondaı-aq balalardyń otpen oınaýy.
TJM azamattardy dala jáne orman alqaptarynda bolǵan kezde órt qaýipsizdigi erejelerin saqtaýǵa shaqyrady. Ot jaqpaýǵa, qoqys pen qurǵaq shópti órtemeýge, balalarǵa otpen oınaýdyń qaýpin túsindirýge keńes beredi. Órt qaýipsizdigi talaptaryn buzǵandar ákimshilik jaýapkershilikke tartylatynyn eskertedi. Órtti baıqaǵan jaǵdaıda dereý 101 nemese 112 nómirine habarlaý qajet.
Aıta keteıik, Saıramda qoıma órtendi.