Órt qaýipti kezeńde qandaı talaptardy qatań saqtaý qajet
ASTANA. KAZINFORM – Órt qaýipti kezeńniń qaýipsiz ótýin qamtamasyz etý maqsatynda elimizdiń barlyq óńirinde aldyn alý sharalary kúsheıtildi.
Tótenshe jaǵdaılar mınıstrliginiń málimetinshe, bıyl órt qaýipti maýsym ońtústik jáne keıbir batys óńirlerde – Almaty qalasy, Almaty, Atyraý, Jambyl, Jetisý, Qyzylorda, Mańǵystaý jáne Túrkistan oblystarynda 26 naýryzdan bastaldy.
Al ortalyq, soltústik jáne birqatar batys óńirlerde – Abaı, Ulytaý, Aqmola, Aqtóbe, Batys Qazaqstan, Qaraǵandy, Qostanaı, Pavlodar jáne Soltústik Qazaqstan oblystarynda 6 sáýirden, Shyǵys Qazaqstan oblysynda 13 sáýirden bastap kúshine endi.
Vedomstvo azamattardy órt qaýipsizdigi talaptaryn, ásirese ashyq otty paıdalaný kezinde qatań saqtaýǵa shaqyrady.
- Senbilik ótkizý, úı mańyndaǵy aýmaqtardy, baqsha jáne saıajaı ýchaskelerin tazalaý barysynda asa saq bolý qajet. Qurǵaq, ystyq jáne jeldi aýa raıynda ot jaǵýǵa, qoqys órteýge qatań tyıym salynady.
Aýa raıy qolaıly bolǵan jaǵdaıda ǵana ǵımarattar men qurylystardan keminde 50 metr qashyqtyqta, arnaıy belgilengen oryndarda jáne turaqty baqylaýmen ot jaǵýǵa ruqsat beriledi, - delingen TJM aqparatynda.
Sondaı-aq mangaldy (barbekıý, grıl) paıdalaný kezinde ony ǵımarattardan keminde 10 metr qashyqtyqta ornalastyryp, órt sóndirgishpen nemese keminde 10 lıtr sýy bar ydyspen qamtamasyz etý qajet.
TJM ókilderi sóndirilmegen temeki tuqyldaryn, sirińkeni tastamaýǵa, qurǵaq shópti órtemeýge, sondaı-aq úı men saıajaı aýmaǵyn únemi janǵysh qaldyqtardan tazalap otyrýǵa keńes beredi.
Sonymen qatar balalardyń otpen oınaýyna jol bermeý qajettigi eskertildi.
Órt belgileri baıqalǵan jaǵdaıda azamattar 101 nemese 112 nómirlerine dereý habarlasýy tıis.
Aıta keteıik, buǵan deıin kópqabatty úıdegi órt kezinde aman qalý úshin páterde qandaı quraldar bolýy kerek ekenin jazdyq.
