Órt qaýipsizdigine spýtnıkten monıtorıng júrgizetin júıe jetildiriledi

ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Úkimet otyrysynda órt qaýipsizdigine spýtnıkten monıtorıng júrgizetin júıe jetildiriletinin aıtty.

— Tabıǵı órtterdiń týyndaý qaýpiniń aldyn alý úshin mınıstrlik órt qaýiptilik klasy men órt qaýiptilik ındeksin kórsetetin karta ázirledi. Atalǵan karta mchs.gharysh.kz geoaqparattyq júıesinde jáne Tabigat.gov.kz aqparattyq júıesinde qoljetimdi. Bul tásil jerústi meteostantsııalary men Jerdi qashyqtan zondtaý spýtnıktik derekterin biriktiredi. Nátıjesinde búkil el aýmaǵy qamtylyp, boljam dáldigi artady, — dedi ol.

Sondaı-aq, tsıfrlyq tehnologııalardyń kómegimen órt bolýy múmkin jerdegi eń ystyq núktelerdi baqylaý arqyly órt qaýipsizdiginiń betalysy boljaý tásili synaqtan ótip jatyr.

— Temperatýrasy qalyptan tys joǵary aımaqtar spýtnık arqyly tirkelip, jerústi stantsııasyna beriledi jáne 2–4 saǵat ishinde kartada kórsetiledi. Qazirgi tańda Ekologııa jáne Tótenshe jaǵdaılar mınıstrlikteri bul kartalarǵa mchs.gharysh.kz geoaqparattyq júıesinde jáne Tabigat.gov.kz aqparattyq júıesinde qol jetkizip otyr. Kórsetý ýaqytyn 30 mınýtqa deıin qysqartý úshin shilde aıynda jerústi stantsııasyn jańǵyrtý josparlanýda, — dedi Jaslan Mádıev.

Aıta keteıik, Shyǵys Qazaqstan oblysy Zaısan aýdanynda órt sóndirýshiler qamys pen shópti sharpyǵan tilsiz jaýmen áli kúresip jatyr.