Órt qaýipsizdigin saqtamaǵan kásiporyndar eki aıǵa jabylýy múmkin
Tótenshe jaǵdaılar mınıstrligi Órtke qarsy qyzmet komıteti tóraǵasynyń orynbasary Marǵulan Amanbaev Senat depýtattary órt qaýipsizdigin saqtamaǵan kásiporyndardyń jumysyn eki aıǵa toqtatýǵa múmkindik beretin bapty qarap jatqanyn aıtty, dep Kazinform.
«Tótenshe jaǵdaılar mınıstrligi bıyl bıznesti órt qaýipsizdigine teksere ala ma? Talapty saqtamaǵan kásiporyndar jabyla ma?» - dep surady jýrnalıst Úkimet otyrysynan keıin ótken brıfıngide.
Marǵulan Amanbaev shaǵyn jáne orta bıznesti tekserýge qoıylǵan moratorıı bıyl alynǵanyn eske saldy.
«Jyldyń birinshi jartysynda tekserý júrgizbeımiz. Moratorıı kezinde olardy tizimge engizbegen edik. Sondyqtan jyldyń ekinshi jartysynan bastap búkil bıznesti tekserý bastalady. Tekserýden óte almaǵan kásiporyndardy jabýǵa kelsek, qazir Senatta zań qaralyp jatyr. Ol zań boıynsha aıyppul kólemi ulǵaıý kerek jáne órt qaýipsizdigin saqtamaǵan kásiporyndardy jabý quqyǵy paıda bolady. Aıyppuldar shaǵyn jáne orta bıznes úshin 15 aılyq eseptik kórsetkishten 100 AEK-ke deıin, iri bıznes úshin 150 AEK-ten 300 AEK-ke deıin ulǵaıady. Sondaı-aq bıznestiń qyzmetin eki aıǵa toqtata turý quqyǵy paıda bolady», - dedi komıtet basshysynyń orynbasary.
