Órt qaýipsizdigin buzǵan elordalyqtar jarty mıllıon teńgege aıyppul arqalady
ASTANA. KAZINFORM — Elordada reıd kezinde órt qaýipsizdigi erejelerin buzýdyń birneshe faktisi anyqtaldy.
Tolyǵyraq Astana qalasy Tótenshe jaǵdaılar departamenti memlekettik órt baqylaý basqarmasynyń bastyǵy Ádil Brataev aıtyp berdi.
— Órt qaýipsizdigine baqylaýdy kúsheıtý aıasynda Tótenshe jaǵdaılar qyzmetkerleri polıtseılermen birge ot jaǵýǵa tyıym salý boıynsha reıdtik is-sharalar ótkizip jatyr. Reıd barysynda órt qaýipsizdigi erejelerin buzýdyń 3 faktisi anyqtaldy. Aıyptylarǵa ákimshilik quqyq buzýshylyq kodeksiniń 336-baby boıynsha 471 840 teńge kóleminde aıyppul salyndy, — dedi Ádil Brataev Astana qalasy kommýnıkatsııalar qyzmeti alańynda ótken baspasóz máslıhatynda.
Osy oraıda Tótenshe jaǵdaılar departamentiniń ókili halyq arasynda órt qaýipsizdigine qatysty túsindirý jumystarynyń kúsheıtilgenin aıtyp otyr.
— Áleýmettik jelilerde 87 jarııalanym, jasyl beldeý aýmaǵynda 25 eskertý taqtaıshasy men 2 banner ornatyldy, — deıdi ol.
Birneshe kún buryn elordada jataqhanadan órt shyǵyp, 50 adamdy evakýatsııalaǵan edi.
Sondaı-aq bıyl naýryzda Astanada 60 adam órtten qutqaryldy.
Buǵan deıin Astana qalasynyń Tótenshe jaǵdaılar departamenti elorda jurtyn órt qaýipsizdigin qatań saqtaýǵa shaqyrdy.