Órt qaýipsizdigi talaptaryn buzǵan 1,6 myńnan astam adam jaýapqa tartyldy
ASTANA. KAZINFORM - Tabıǵı órtterdiń týyndaýyna jol bermeý jáne olardyń qaýpin tómendetý maqsatynda TJM múddeli memlekettik organdarmen birlesip aldyn alý sharalarynyń keshenin júzege asyryp jatyr, dep habarlaıdy QR Tótenshe jaǵdaılar mınısrliginiń baspasóz qyzmeti.
Baspasóz qyzmetiniń habarlaýynsha, TJM orman sharýashylyqtarynda qosymsha mehanıkalandyrylǵan patrýlderdiń jumysy uıymdastyrdy.
Búgingi kúni 8 orman mekemesi qamtylyp, barlaý júrgizý men órt oshaqtaryn jedel sóndirýge qajetti jabdyqtarmen qamtamasyz etilgen 12 ýaqytsha beket ornalastyryldy.
Sonymen qatar, órt qaýpi joǵary óńirlerde sý tógý qurylǵylarymen jabdyqtalǵan tikushaqtardyń kezekshiligi uıymdastyrylǵan.
Tabıǵat qorǵaý jáne orman sharýashylyǵy mekemelerimen birlesip, órt týyndaǵan jaǵdaıda is-qımyl algorıtmderin pysyqtaýǵa baǵyttalǵan 130 órt-taktıkalyq oqý-jattyǵý ótkizildi.
Tabıǵı órtterdiń kórshiles memleketter aýmaǵynan taralý qaýpi tóngen jaǵdaıda ózara is-qımyldy jetildirý maqsatynda avarııalyq-qutqarý bólimsheleriniń memlekettik shekaradan jeńildetilgen tártippen ótý tetikterin pysyqtaı otyryp, transshekaralyq oqý-jattyǵýlar uıymdastyrylyp jatyr.
-Búgingi tańda Reseı Federatsııasy men Qyrǵyz Respýblıkasynyń TJM bólimshelerimen birlesken úsh keshendi órt-taktıkalyq oqý-jattyǵý ótkizildi. Sonymen qatar, ormandy-dala alqaptarynda TJM, polıtsııa jáne orman qyzmeti qyzmetkerlerinen quralǵan mobıldi toptar patrýldeý jumystaryn júrgizip jatyr. Ótkizilgen reıdtik is-sharalar barysynda órt qaýipsizdigi talaptaryn buzǵany úshin 1,6 myńnan astam adam ákimshilik jaýapkershilikke tartylyp, jalpy somasy 33 mıllıon teńgeden astam aıyppul salyndy,-delingen habarlamada.
TJM azamattardy órt qaýipsizdigi talaptaryn qatań saqtaýǵa jáne órt shyǵý faktileri týraly dereý habarlaýǵa shaqyrady.
Qurǵaq ósimdikterdi órteýge, orman alqaptarynda, qalyń butalardyń arasynda jáne aýyl sharýashylyǵy jerlerine jaqyn mańda ot jaǵýǵa tyıym salynady. Tolyq sóndirilmegen temeki tuqyldaryn, sirińkelerdi, shyny zattardy jáne órttiń shyǵýyna sebep bolýy múmkin ózge de zattardy qaldyrýǵa jol berilmeıdi. Qarapaıym qaýipsizdik erejelerin saqtaý – tabıǵatty qorǵaýǵa qosqan ár azamattyń úlesi.
Osyǵan deıin Tótenshe jaǵdaılar mınıstrliginiń ulttyq parkterdegi órtti arnaıy kameralar arqyly baqylaıtyny týraly jazdyq.
