Órt qaýipsizdigi talabyn buzǵandar 52 mln teńge aıyppul arqalady — TJM

ASTANA. KAZINFORM — Órt qaýpi kezeńi bastalǵaly qaýipsizdik erejelerin buzǵany úshin 3 397 adam ákimshilik jaýapkershilikke tartyldy. Bul týraly Tótenshe jaǵdaılar mınıstrligi Órtke qarsy qyzmet komıtetiniń tóraǵasy Erlan Tóregeldıev málim etti. 

— Salynǵan aıyppuldyń jalpy somasy 52 mıllıon 116 myń teńgege jetti. Órt qaýpi kezeńi bastalǵaly elimizde jalpy aýdany 27 myń gektar jerde 261 orman órti, 16 dala órti jáne 14,5 myń gektar jerde 1 357 shóp janý deregi tirkeldi, — dedi Erlan Tóregeldıev ortalyq kommýnıkatsııalar qyzmeti alańynda ótken baspasóz máslıhatynda.

Osy oraıda Tótenshe jaǵdaılar mınıstrligi tilsiz jaýdyń aldyn alý maqsatynda belsendi jumys júrgizip jatyr.

— «Orman» jáne «Tabıǵat» aqparattyq júıeleri, orman sharýashylyqtaryndaǵy beınebaqylaý, ǵaryshtyq monıtorıng jáne tótenshe jaǵdaı geoaqparattyq júıesi arqyly órt jaǵdaıyna táýlik boıy monıtorıng júrgiziledi, — deıdi mınıstrlik ókili.

Onyń aıtýynsha, orman alqaptarynda sý shashatyn qurylǵymen jabdyqtalǵan 24 áýe kemesi kezekshilikte tur. Sonymen qatar Tótenshe jaǵdaılar mınıstrliginiń kúshimen 26 orman sharýashylyǵynda 36 mehanıkalandyrylǵan baqylaý beketi ornalastyrylǵan.

— Tabıǵı órttiń aldyn alý jáne jedel áreket etý boıynsha engizilgen model adam áreketinen týyndaıtyn órt sanyn edáýir qysqartýǵa múmkindik berdi. Orman órtiniń 60%-dan astamy naızaǵaı, taǵy sol sııaqty tabıǵı qubylystardan paıda bolsa, 20%-dan astamy adam áreketiniń saldyran shyǵady, — dep túsindirdi Erlan Tóregeldıev brıfıng barysynda.

Aıta ketsek, órt qaýpi kezeńi bastalǵannan beri 261 orman órti tirkeldi. 

Eske salaıyq, búginde elimizdiń jeti óńirinde orman órti shyǵý qaýpi joǵary bolyp tur.