Órt qaýipsizdigi aılyǵy: birinshi kezekte stýdentter jataqhanalary tekseriledi
ASTANA. KAZINFORM — Gazben jylytý júıesi bar ár úıde dabyl datchıgi, sertıfıkattalǵan qazandyqtar men qurylǵylar bolýǵa tıis. Bul týraly búgin Úkimet otyrysynda Premer-mınıstr Oljas Bektenov málim etti.
- Memleket basshysy halyqqa Joldaýynda gaz tartý jumysyn jalǵastyrýdyń mańyzyn atap ótti. Gaz jabdyqtaryn ornatý kezinde barlyq qaýipsizdik talaptaryn qatań saqtaý qajet. Gazben jylytý júıesi bar ár úıde kógildir otynnyń shyǵýyn anyqtaıtyn dabyl datchıgi, sertıfıkattalǵan qazandyqtar men qurylǵylar bolýǵa tıis, - dedi Oljas Bektenov.
Onyń sózine qaraǵanda, gaz qyzmetteri turǵyn úılerde gazdy qaýipsiz paıdalaný talaptarynyń saqtalýyn baqylaý boıynsha tıisti jumysty uıymdastyrýǵa mindetti.
- Óńir ákimdikterine osy baǵytta qajetti sharalar qabyldaýdy tapsyramyn, - dedi Premer-mınıstr.
Sonymen qatar Úkimet basshysy ákimdikter Tótenshe jaǵdaılar mınıstrligimen birlesip, turǵyn úı sektorynda órt qaýipsizdigi aılyǵyn qarasha aıynyń sońyna deıin jalǵastyrýy qajet ekenin aıtty. Birinshi kezekte, stýdentter turatyn oryndardy –jataqhanalar men hostelderdi, sondaı-aq bilim berý nysandaryn erekshe baqylaýǵa alý kerek.
- Mádenıet jáne aqparat mınıstrligi ákimdiktermen birlesip, profılaktıkalyq materıaldardy buqaralyq aqparat quraldary men áleýmettik jelilerde taratý máselelerin pysyqtasyn. Jalpy, Tótenshe jaǵdaılar mınıstrligine jylý berý kezeńinde órt jaǵdaılarynyń aldyn alý boıynsha múddeli memlekettik organdar men ákimdikterdiń jumysyn tıimdi úılestirýdi tapsyramyn, - dedi Oljas Bektenov.
Buǵan deıin habarlanǵandaı, búgin Úkimet otyrysynda Premer-mınıstr Oljas Bektenov órt qaýipsizdigi máselesi boıynsha jaýapty vedomstvolarǵa reıd júrgizýdi tapsyrdy.