Órt qaýpin tóndirip turǵan 822 nysandy paıdalanýǵa shekteý engizildi
ASTANA. 23 shilde. QazAqparat - Bıylǵy jarty jylda órt qaýpin tóndirip turǵan 822 nysandy paıdalanýǵa shekteý engizildi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Tótenshe jaǵdaılar mınıstri Vladımır Bojko málim etti.
«Tynys-tirshilikti qamtamasyz etý, óndiristik jáne áleýmettik-mádenı saladaǵy 20154 nysan órt qaýipsizdigi qaǵıdalary men normalaryn saqtaý turǵysynda tekserildi. Tekserý barysynda órt qaýpin tóndirip turǵan 822 nysandy paıdalanýǵa shekteý engizildi», - dedi mınıstr.
Sonymen qatar 105275 ereje talaptaryn saqtamaý faktileri anyqtaldy. Órt qaýipsizdigi qaǵıdalaryn buzǵany úshin 15552 adam ákimshilik jazaǵa tartyldy, onyń ishinde 14662 laýazymdy tulǵaǵa 168 mln. 975 myń teńge somada aıyppul salyndy. Bul rette mınıstrliktiń memlekettik órtke qarsy qyzmeti salasy boıynsha 147013 nysan baqylaýda turǵanyn atap ótken jón.
Órt avtomatıkasymen jabdyqtalǵan bilim berý nysandarynyń sany 25%-ǵa, densaýlyq saqtaý 22%-ǵa ósýi órtke qarsy talaptardy kúsheıtýdiń nátıjesi boldy.
Aǵymdaǵy jylǵy 6 aıda respýblıka aýmaǵynda 108 orman órti tirkeldi, onyń aýmaǵy 1581 gektardy qamtydy. Keltirilgen zalal 10 mln. 155 myń teńge. Budan bólek 1052 dala órti men jazyqtyq aýmaqtyń janýy tirkeldi, onyń jalpy aýdany - 19 549 gektar.
