Órt qaýpi joǵary: Almatyda jylytý maýsymy bastalǵaly 5 myń eski úı baqylaýǵa alyndy
ALMATY. KAZINFORM — Almatyda jylytý maýsymy kezinde órttiń aldyn alyp, turǵyndardyń qaýipsizdigin qamtamasyz etýdi kózdeıtin keshendi jumysty qolǵa aldy. Bul týraly Óńirlik kommýnıkatsııalar qyzmetinde TJD Memlekettik órt baqylaý basqarmasynyń bastyǵy Konstantın Kanın aıtty.
Megapolıste jylytý maýsymy 10 qazanda bastaldy. Onyń aıtýynsha, órt qaýpin azaıtý maqsatynda Tótenshe jaǵdaılar departamenti profılaktıkalyq is-sharanyń ortalyqtanǵan josparyn ázirlegen. Esepke 151 myńnan astam jeke turǵyn úı alynǵan. Onyń ishinde qatty otynmen jylıtyn peshi bar 1 450 úı men qańqaly-qamysty úlgidegi 5 605 eski úı erekshe baqylaýǵa alynǵan.
— Profılaktıkalyq jumystyń basty maqsaty — turǵyndarǵa órt qaýipsizdigi erejesin eskertý ǵana emes, keler qaýip-qaterdi der kezinde anyqtap, olardy joıýǵa kómektesip, oqys oqıǵanyń aldyn alý. Sondyqtan biz mekenjaı boıynsha aralaý jumysyn júrgizip, túsindirip, oqytý is-sharasyn uıymdastyramyz. Bul rette qosymsha qoldaýdy qajet etetin halyqtyń áleýmettik sanatyna erekshe kóńil bólinedi, — dedi Konstantın Kanın.
Sonymen qatar ol 2018 jyldan beri qalalyq jáne aýdandyq ákimdiktiń qoldaýymen jeke turǵyn úılerge 2 694 ıis gazyn anyqtaıtyn datchık ornatylǵanyn atap ótti. Mundaı qurylǵy gazdyń qaýipti kontsentratsııasyn der kezinde anyqtap, ýlaný qaýpin azaıtýǵa sep bolady.
Odan bólek 15 qyrkúıekten bastap órt qaýipsizdigi aılyǵy ótip jatyr. Onyń aıasynda TJD qyzmetkerleri jeke sektor men kóp qabatty úıdiń turǵyndarymen kezdesip, aýlalardy aralap, jadynama taratady. Profılaktıkalyq jumysta ádettegi aralaý men kezdesýden bólek, osy zamanǵy tsıfrlyq quraldar da qoldanylady. Máselen, QR-kodtar arqyly turǵyndar Telegram-botqa ótip, órt qaýipsizdigi týraly aqparat ala alady.
Sondaı-aq halyq kóp shoǵyrlanatyn oryndardaǵy LED-ekrandarda oqytatyn beınerolıkter kórsetiledi. Uıaly baılanys operatorymen birlesip, jylytý peshin paıdalanar kezde órt qaýipsizdigi talabyn saqtaý jóninde SMS-habarlamalar taratylǵan. Onyń qamtý aýqymy 7,6 mln abonentten asqan.
TJD ókilderi órttiń aldyn alýǵa kómektesetin qarapaıym erejelerdi turǵyndardyń esine saldy:
— murjany keminde eki aıda bir tazalap turyńyz;
— peshti shamadan tys qyzdyrmańyz jáne onyń janyna janǵysh zatty qoımańyz;
— gaz peshin paıdalanar kezde nusqaýlyqtaǵy talapty qatań saqtańyz;
— janyp turǵan pesh pen qosýly elektr qurylǵysyn qaraýsyz qaldyrmańyz;
— balalarǵa otty baqylaýdy tapsyrmańyz;
— sirińke men ottyqty balalardyń qoly jetpeıtin jerge qoıyńyz;
— ásirese elektr jylytqyshyn paıdalanǵan kezde elektr symynyń jaı-kúıin únemi tekserip otyryńyz;
— órt shyqqan jaǵdaıda dereý 101 nemese 112 nómirine habarlasyńyz.
Eske salaıyq, Qazaqstanda jyl basynan beri turǵyn úılerde 4,8 myńnan astam órt shyqqan.
