Órt qaýpi kúsheıdi: TJM jazdyń eń qıyn kezeńine daıyndalyp jatyr
ASTANA. KAZINFORM — Elimizde bıyl joǵary aýa temperatýrasy, qatty jel men aýanyń tómen ylǵaldylyǵy sııaqty qaýipti órt kezeńi boldy. Soǵan qaramastan tabıǵı jáne dala órtteriniń basym bóligi alǵashqy kezeńderinde-aq sóndirilip jatyr. Bul týraly Tótenshe jaǵdaılar mınıstrliginde ótken brıfıngte Órtke qarsy qyzmet komıtetiniń tóraǵasy Erlan Tóregeldıev málim etti.
— Búginde barlyq bólimshe kúsheıtilgen rejımde jumys istep jatyr. Táýlik boıy monıtorıng júrgizilip jatyr. Tabıǵı jáne dala órtteriniń basym bóligi bastapqy kezeńde sóndirilip, olardyń iri tótenshe jaǵdaılarǵa ulasýyna jol berilmeı otyr, — dedi Erlan Tóregeldıev.
Onyń aıtýynsha, qazirgi tańda mınıstrlik órt qaýipti aýmaqtardy táýlik boıy baqylap, áýe jáne jerústi barlaýyn júrgizip keledi.
Sonymen qatar barlyq kúsh pen tehnıkalar jedel áreket etýge daıyn.
Memleket basshysynyń tapsyrmasyna sáıkes sońǵy jyldary Tótenshe jaǵdaılar mınıstrliginiń materıaldyq-tehnıkalyq bazasy edáýir kúsheıtildi. Órt sóndirý jáne arnaıy tehnıkalar jańartylyp, avıatsııanyń múmkindikteri keńeıtilgen. Buǵan qosa tsıfrlyq tehnologııalar, ushqyshsyz ushý apparattary men ǵaryshtyq monıtorıng júıeleri keńinen engizilip jatyr.
— Ushqyshsyz ushý apparattary men ǵaryshtyq monıtorıng júıeleri órt oshaqtaryn erte anyqtap, jedel sheshim qabyldaýǵa múmkindik beredi. Sonyń nátıjesinde mınıstrliktiń tabıǵı órtterge den qoıý múmkindigi birneshe jyl burynǵyǵa qaraǵanda aıtarlyqtaı artty, — dedi komıtet tóraǵasy.
Spıkerdiń sózinshe, alda jaz mezgiliniń eń kúrdeli kezeńi tur. Osyǵan baılanysty mınıstrlik kúshteri joǵary daıyndyq rejıminde jumysyn jalǵastyryp, órt qaýipti aýmaqtarǵa monıtorıng pen qosymsha patrýldeýdi kúsheıtti.
Aıta keteıik, Qazaqstanda bir táýlikte naızaǵaı saldarynan 55 orman órti shyqqanyn jazǵan edik.
