Órt qaýpi kezeńi bastalǵannan beri 261 orman órti tirkeldi

ASTANA. KAZINFORM — Órt qaýpi erejesin buzǵan 3 myńnan astam adam ákimshilik jaýapkershilikke tartyldy. Bul týraly TJM Órtke qarsy qyzmet komıtetiniń tóraǵasy Erlan Tóregeldıev aıtty.

— Orman alqaptarynda sý shashý qurylǵylary bar avıatsııa kezekshilik atqarady. Búginde 24 bort daıyndyqta tur. 26 ormanshylyqta mınıstrliktiń kúshteri 36 mehanıkalandyrylǵan kúzet beketin qurdy. Tabıǵı órtterdiń aldyn alýdyń jańa modeli órt sanyn barynsha azaıtýǵa múmkindik berdi. Elimizdiń orman-dala alqaptarynda aldyn alý sharalaryn júrgizý úshin Tótenshe jaǵdaılar mınıstrligi, polıtsııa jáne orman sharýashylyǵy mekemeleriniń qyzmetkerleri qatarynan mobıldik toptar quryldy. Órt qaýipsizdigi erejelerin buzǵany úshin 3 000 astam adam ákimshilik jaýapkershilikke tartyldy. 52 mln 116 myń teńge aıyppul salyndy, — dedi ol Ortalyq kommýnıkatsııalar qyzmetindegi brıfıngte.

Onyń atap ótýinshe, órt qaýipi kezeńi bastalǵannan beri barlyǵy 27 myń gektar alqapta 261 orman órti boldy. Sondaı-aq jalpy aýdany 14,5 myń gektarda 16 dala órti jáne 1 357 janý oqıǵasy tirkeldi.

— Qazirgi ýaqytta órt qaýipti kezeńi joǵary bolyp tur. Eldiń birqatar aımaǵynynda joǵary órt qaýpi dárejesi saqtalýda. Osyǵan baılanysty, órt qaýipsizdigi sharalaryn qatań saqtaýǵa shaqyramyz. Órt qaýpi joǵary kezeńde eldi mekenderde, ormandarda, egin janynda ot jaǵýǵa tyıym salynady, — dedi Erlan Tóregeldıev.

Keshe Tótenshe jaǵdaılar mınıstrligi elimizdiń birqatar óńirinde ystyq jáne qurǵaq aýa raıyna baılanysty órt qaýpiniń joǵary deńgeıi saqtalyp otyrǵanyn eskertti.