Órt qaýipsizdigine qatysty 4 mıllıonǵa jýyq adamǵa nusqaý berildi
NUR-SULTAN. QazAqparat – QR Premer-Mınıstri Asqar Mamın turǵyn úılerde órt qaýipsizdigi máselelerin erekshe baqylaýǵa alý men órt profılaktıkasy boıynsha jumystarǵa túsinik berdi, dep habarlaıdy QazAqparat tilshisi.
«Azamattyq qorǵaý organdary jyl saıyn órtterdi, gaz ballondarynyń jarylystaryn, turǵyn úı sektorynda adamdardyń qaza bolýy men jaraqattanýyn azaıtýǵa baǵyttalǵan profılaktıkalyq is-sharalar keshenin iske asyrýda. Karantındik shekteýlerdiń engizilýine baılanysty 2020 – 2021 jylǵy jylytý kezeńinde ataýly profılaktıkalyq jumystar negizinen habarlama tártibinde, baılanyssyz is-sharalar júrgizý jáne buqaralyq aqparat quraldary arqyly júrgiziledi», - delingen Úkimet basshysynyń depýtattyq saýalǵa bergen jaýabynda.
Onyń aıtýynsha, aǵymdaǵy jylǵy jylytý kezeńinde mamandar 2 mln astam úıdi aralap, shamamen 4 mln azamatqa nusqaý berildi.
«Aralaý barysynda 476 myńnan astam jeke turǵyn úıde 661 myńnan astam órt qaýipsizdigi talaptarynyń buzylýy anyqtaldy, 246 myńnan astamy aralaý barysynda joıyldy (pesh aldy ottyq tabaqtaryn ornatý, jylytý jabdyqtarynyń ústine kıimdi keptirý jáne t.b.). Atalǵan jumysty ýákiletti memlekettik organdar júıeli negizde júrgizip otyrady. Jalpy turǵyn úı sektorynda órt qaýipsizdigin qamtamasyz etý máselesi ýákiletti memlekettik organdardyń turaqty baqylaýynda tur», - dedi A. Mamın.
Budan buryn habarlanǵandaı, Premer-Mınıstr Tótenshe jaǵdaılar mınıstrligi jańadan jobalanatyn kóppáterli turǵyn úılerdi avtomatty órt dabyly júıelerine baılanysty túzetýler daıyndaǵanyn aıtty.
Eske sala keteıik, Májilistiń jalpy otyrysynda depýtattar órt qaýipsizdigine baılanysty Úkimet basshysynyń atyna depýtattyq saýal joldaǵan bolatyn.
