Órt qaýipsizdigin buzǵan pavlodarlyqtarǵa jeti mıllıon teńgeden astam aıyppul salyndy
ASTANA. QazAqparat - Pavlodar oblysynda bıylǵy jyly órt qaýipsizdigin buzǵan 325 jeke jáne zańdy tulǵaǵa jeti mıllıon teńgeden astam aıyppul salyndy, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde ótken baspasóz jıynynda oblystyq Tótenshe jaǵdaılar departamenti basshysynyń orynbasary Samat Asaınov málim etti.
«Bes aıdyń ishinde 460 nysan tekserilip, 2336 órt qaýipsizdigi erejesiniń buzylýy tirkeldi. 580 jeke jáne zańdy tulǵa ákimshilik jaýapqa tartyldy. Onyń 325-ine aıyppul salyndy. Jyl basynan beri tilsiz jaýdan 25 adam zardap shegip, 14-i qaza boldy. Sol 14 adamnyń segiziniń qanynan alkogol tabyldy. Tótenshe jaǵdaıdyń aldyn alý úshin aldyn ala eskertý kerek. Sondyqtan qyzmetkerlermen halyq arasynda 697 dáris oqyldy. 288 ret aýyldyq jerlerge shyqtyq. 136 myń adamdy qamtyp, 57 myń aýlany araladyq.», - dedi Samat Asaınov.
Onyń sózinshe, Reseıdiń Kemerovo oblysyndaǵy oqıǵadan keıin óńirde 81 saýda, oıyn-saýyq mekemelerine tekserý júrgizilgen.
«Olardyń barlyǵynda órt qaýipsizdigi erejeleri buzylǵany anyqtaldy. Keıbirinde qarapaıym zańbuzýshylyqtar bar. Olardyń barlyǵyn eki aıdyń ishinde qalypqa keltirý tapsyryldy. Jalpy, 1289 ereje buzýshylyq anyqtalyp, 78 zańdy tulǵaǵa 1 mılıon teńgeden astam aıyppul salyndy», - dedi Samat Asaınov.
Aıta keteıik, aǵymdaǵy jyly oblystyq TJD bólimderine 1406 shaqyrý kelip túsken. 135 adam apattan qutqarylyp, 400 adam evakýatsııalandy.
