Órt qaýipsizdigi: TJM qyzmetkerleri 2 mln úıdi aralap shyǵady
«Jyl saıyn jylytý kezeńi turǵyn úı sektorynda órt-profılaktıkalyq is-sharalarynan bastalady. Ótken jyldary bul jumysqa tek TJM jáne polıtsııa qyzmetkerleri jumyldyryldy. Al 2019 jyldan bastap TJM bastamasy boıynsha halyqtyń áleýmettik osal toptarynyń, jetim balalardyń, kópbalaly otbasylardyń úılerine barý ákimdikterdiń áleýmettik qorǵaý qyzmetteriniń ókilderimen birlesip júzege asyrylýda», - dedi N. Derbisov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, 15 tamyzdan 15 qyrkúıekke deıin órt qaýipsizdigi aktsııasynyń I-kezeńi ótken. Onda ákimdik ókilderimen birlesip, halyqtyń áleýmettik osal toptarynyń, kópbalaly otbasylardan shyqqan balalardyń, jetim balalardyń úılerine baryp, qajetti kómek kólemi anyqtalǵan.
Al 15 qyrkúıekten 15 qazanǵa deıin aktsııanyń II kezeńinde TJ týyndaý qaýpi bar, ıaǵnı avtonomdy jylytý júıeleri bar úıler aldyn alý jumystarymen qamtyldy.
«Jalpy aralaý barysynda TJM qyzmetkerleri 764 myńnan astam úıdi aralady, alaıda 51 myń úıdiń turǵyndaryn tekserý men keńes berýden bas tartty. Ákimdik ókilderimen birlesip 71 myń úı aralanyp, 747 myń azamatqa nusqaý berildi. 118 myńǵa jýyq úıde 158 myń órt qaýipsizdigi talaptaryn buzý jaǵdaıy anyqtaldy, onyń ishinde 40 myńnan astamy sol jerde joıyldy», - dedi ol.
Spkıer buzýshylyqtardyń 90%-y elektr tehnıkalyq jeliler men elektr jabdyqtaryn jáne avtonomdy jylytý júıelerin paıdalanýmen baılanysty ekenin atap ótti.
«Profılaktıkalyq jumystar bir ret barýmen jáne úgit materıaldaryn taratýmen shektelmeıdi. Órt qaýipsizdigi talaptaryn buzǵan úılerge qaıta barady. Bıyl sońyna deıin shamamen 2 mln jeke úıdi aralaý josparlanyp otyr», - dedi N. Derbisov.
