Órt qaýipsizdigi týraly joba boıynsha qos palata arasynda kelisim komıssıaısy qurylady - Parlament
ASTANA. Mamyrdyń 5-i. QazAqparat /Qanat Mámetqazyuly/ ‑ Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine órt qaýipsizdigi máseleleri boıynsha ózgerister men tolyqtyrýlar engizý týraly» zań jobasyna Parlament Senaty tarapynan engizilgen túzetýlerdi talqylady.
Ol boıynsha qos palata arasynda kelispeýshilikterdi eńserý jónindegi kelisim komıssııasy qurylatyn boldy, dep habarlaıdy QazAqparat.
Zań jobasy halyqtyń, zańdy tulǵalar men dara kásipkerler múlkiniń qorǵalý deńgeıin olardyń qaýipsizdigi jaı-kúıin baǵalaýdy táýelsiz sarapshy uıymdar salasyna engizý jolymen arttyrý maqsatynda ázirlengen. Sonymen birge, qujat boıynsha memlekettik órt baqylaý organdary júzege asyratyn tekserister sanyn qysqartý esebinen qorǵaý nysandaryna ákimshilik júktemeni azaıtý jáne baqylaý qyzmetiniń nysandary men ádisterin jetildirý sharalary da qamtylady. Zańnamalyq deńgeıde sarapshy uıymdardy akkredıtteý tártibi, sarapshy uıymdardyń da, ýákiletti organnyń da qaterdi baǵalaý salasyndaǵy quqyqtary men mindetteri aıqyndalady.
Sonymen birge, memlekettik órt baqylaý organdary jeke kásipkerlik sýbektileriniń bir bóligin tekserýden bosatady, olardyń negizgi kúshi qaýiptiligi joǵary jáne áleýmettik nysandardy baqylaýǵa qaraı baǵyttalady. Qujatta qarastyrylǵan normalar arqyly kásipkerlik qyzmetti tekserý úderisteri birshama qysqarady. Budan bólek, órtke qarsy erikti qurylymdardy qurý jáne olardyń qyzmetin júzege asyrýdyń tártibi reglamentteletin bolady.
Májilis maquldaǵan zań jobasyna senatorlar birqatar túzetýler engizgen bolatyn. Máselen, qujatta adamdar jappaı jınalatyn nysan uǵymy naqtylanyp, tolyqtyryldy. Sonymen qatar, senatorlar jergilikti atqarýshy organdardyń órt qaýipsizdigi salasyndaǵy ókilettikteri de aıtarlyqtaı jetildirdi.
Bundaı birqatar túzetýlerge óz qarsylyqtaryn bildirgen Májilis depýtattary kelisim komıssııasyn qurý týraly sheshim qabyldady.
