Órt qaýipsizdigi salasynda qaterlerdi táýelsiz baǵalaý júıesin qurý kózdeledi
ASTANA. Qarashanyń 3-i. QazAqparat /Qanat Mámetqazyuly/ - Búgin QR Parlamenti Májilisi Halyqaralyq ister, qorǵanys jáne qaýipsizdik komıtetiniń keńeıtilgen otyrysynda «Órt qaýipsizdigi týraly» Qazaqstan Respýblıkasynyń Zańyna Qazaqstan Respýblıkasynda órt qaýipsizdigi salasyndaǵy qaterlerdi táýelsiz baǵalaý júıesin qurý boıynsha ózgeris pen tolyqtyrýlar engizý týraly» zań jobasy talqylandy,
dep habarlaıdy QazAqparat.
Atalǵan zań jobasy Úkimettiń 2008 jylǵy qyrkúıektiń 18-indegi qaýlysymen maquldanǵan Qazaqstan Respýblıkasynda órt qaýipsizdigi salasyndaǵy qaýip-qaterlerdi táýelsiz baǵalaý júıesin qurý tujyrymdamasyn iske asyrý sheńberinde ázirlengen.
«Jalpy, osy salada táýelsiz baǵalaý júıesin qurý jurtshylyqtyń, zańdy tulǵalardyń múlikteri men jeke kásipkerlerdiń ıelikteriniń órtten qorǵalý deńgeıin arttyrýdy qamtamasyz etýge baǵyttalady. Bul rette órt qaýipsizdiginiń jaı-kúıin baǵalaý salasyna memlekettik baqylaý organdarymen qatar táýelsiz saraptama uıymdaryn qosý jolymen qorǵaý deńgeıin arttyrýdyń balama ádisterin engizý kózdeledi. Órt qaýipsizdigi aıasynda bundaı táýelsiz júıe qurý nátıjesinde kásipkerlik sýbektilerine keltiriletin tekserister qysymy azaıady. Memlekettik baqylaý jumystary sharasy barysynda ashyqtyqty qamtamasyz etý, jemqorlyqtyń aldyn alý normalary engiziledi. Sondaı-aq memlekettik órtke qarsy baqylaý organynyń jeke kásipkerlik nysandaryn tekserýine shekteý qoıyp, negizgi kúsh órt shyǵý qaýpi óte zor bolyp tabylatyn nysandardy jáne áleýmettik nysandardy baqylaýǵa jumyldyrylady», dedi Tótenshe jaǵdaılar mınıstrligi Órt qyzmeti komıtetiniń tóraǵasy Serik Áýbákirov.
Onyń aıtýynsha, zań jobasyn qabyldaýdaǵy maqsat - memlekettik órt baqylaýy organdary júzege asyratyn tekserister sanyn qysqartý, baqylaý qyzmetiniń nysandary men ádisterin ózgertý esebinen, qorǵaý nysandaryna ákimshilik júktemeni azaıtý bolyp tabylady. Táýelsiz júıeniń qatysýshylaryna baǵalaýǵa tapsyrys berýshiler, onyń ishinde jobalaý uıymdary, belgilengen tártippen akkredıttelgen táýelsiz saraptama uıymdary, sondaı-aq memlekettik órt baqylaýy organdary jatady.
Zań jobasy palatanyń jalpy otyrysyna shyǵarylatyn bolyp kelisildi.
