Órt qaýipsizdigi: Elordada jeke sektorda tekserý júrip jatyr
NUR-SULTAN. QazAqparat – Nur-Cultan qalasy TJD Memlekettik órt baqylaý basqarmasynyń basshysy Erkin Otarǵalymuly qala aýmaǵyndaǵy jeke sektor bóligi órt qaýipsizdigi boıynsha tekserilip jatqanyn aıtty, dep habarlaıdy QazAqparat tilshisi.
«Nur-Sultan qalasynyń Tótenshe jaǵdaılar departamenti elordanyń jeke sektorynda jylytý maýsymy kezeńinde órtterdiń aldyn alýǵa baǵyttalǵan profılaktıkalyq is-sharalar keshenin júrgizip jatyr», - dedi Erkin Otarǵalymuly onlaın rejımdegi brıfıngide.
Onyń aıtýynsha, ótken kezeńde 42 myńnan astam aýlany aralap, órt qaýipsizdigi boıynsha jadynama taratyldy, 55 myńnan astam adamǵa nusqaý berildi.
«Buqaralyq aqparat quraldarynda halyqty aqparattandyrý boıynsha jumys belsendi júrgizilip keledi. «Astana ERTs» JShS kómegimen kommýnaldyq qyzmetterdi tóleý týraly túbirtekterde 325 myń dana kóleminde peshpen jylytýdy paıdalaný kezindegi órt qaýipsizdigi boıynsha jadynama ornalastyrylǵan. Órtke qarsy taqyrypta bılbordtar jáne bannerlerde ornatyldy», - dedi basqarma basshysy.
Qalalyq PIK qaýymdastyǵymen jáne aýdandyq ákimdiktermen ózara is-qımyl kezinde PIK tóraǵalarymen órt qaýipsizdigin qamtamasyz etý máseleleri boıynsha keńester ótkizildi. Turǵyndardyń jalpy úılik chattary, WhatsApp-ta ata-analar chattary belsendi paıdalanylady, olar turǵyndardy turmystaǵy órt qaýipsizdigi sharalary jáne balalardyń otpen oınaýynyń aldyn alý týraly habardar etedi.
Onyń sózine qaraǵanda, Bilim basqarmasymen birlesip qalanyń barlyq bilim berý uıymdarynyń basshylarymen órt qaýipsizdigin qamtamasyz etý máseleleri boıynsha keńes ótkizildi, onyń barysynda balalardyń jaraqattanýy men balalardyń otpen oınaýynyń aldyn alý máseleleri qaraldy.
