Órt 45 jastaǵy azamattyń ómirin qıyp ketti - SQO
PETROPAVL. QazAqparat – Soltústik Qazaqstan oblysyndaǵy Kýstovoe eldi mekeninde órt shyǵyp, bir adam mert boldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, Qyzyljar aýdanyndaǵy Kýstovoe eldi mekeninde turǵyn úıdiń janyp jatqandyǵy jóninde habar órt sóndirý qyzmetine tańǵy saǵat 7.02 mınýt ketkende túsken. Oqıǵa ornyna jetken mamandar jalyndy jarty saǵattyń ishinde aýyzdyqtady. Úı ishinen 1975 jyly týǵan er adamnyń denesi tabyldy.
«Aldyn ala boljam boıynsha, mert bolǵan 45 jastaǵy azamat temeki shegip jatyp uıyqtap ketken. Bir áıelmen azamattyq nekede turǵan eken. Biraq órt kezinde ol úıde bolmaǵan. Qazir kelgen shyǵyn mólsheri anyqtalyp jatyr.
Jalpy jyl basynan oblysta 18 adam qaza taýyp, 7 adam jaraqat aldy. Kóp jaǵdaıda zardap shegetinder - spırttik ishimdik ishetinder», - deıdi SQO TJD bastyǵynyń orynbasary Igor Jýkov.
