Órt 10 adamnyń ómirin jalmap ketti - TJM
ASTANA. Qańtardyń 25-i. QazAqparat - Ótken táýlikte respýblıkada bolǵan órt oqıǵalarynda 10 adam mert boldy, qurban bolǵandardyń arasynda balalar bar,
dep habarlady QR TJM-nyń baspasóz qyzmeti.
Vedomstvo baspasóz qyzmetiniń taratqan aqparatyna sáıkes, qańtardyń 24-i kúni 24.43-te Semeı qalasynda jekemenshik sektordaǵy turǵyn úı janǵan. Jalyn qushaǵynan qutqarylǵan 73 jáne 68 jastaǵy zeınetkerler aýrýhanaǵa barar jolda jantásilim etti.
Osy kúni Qaraǵandyda 13 saǵat 4 mınýtta jekemenshik monshadan shyqqan órtti aýyzdyqtaý barysynda eki adamnyń máıiti tabylǵan. Órt QR TJM Qaraǵandy oblysy boıynsha TJD órtke qarsy qyzmetiniń kúshimen sóndirildi.
Sondaı-aq Soltústik Qazaqstan oblysy Taıynsha aýdanynyń Qyzyl alqap aýylyndaǵy «jer úıde» bolǵan órtte 9 jasar eki bala ólim qushty. 100 sharshy metr aýmaqqa jaıylǵan jalyndy sóndirý barysynda tabylǵan 31 jastaǵy áıel aýrýhanaǵa barar jolda kóz jumdy.
Al Shymkent qalasyndaǵy bes qabatty turǵyn úıde shyqqan órt 60 jastaǵy azamattyń ómirin qıyp ketti. Kúıik jaraqattaryn alǵan 56 jastaǵy áıel aýrýhanada jantásilim etti. Tilsiz jaý qańtardyń 25-ine qaraǵan túni QR TJM Ońtústik Qazaqstan oblysy boıynsha TJD órtke qarsy qyzmetiniń kúshimen aýyzdyqtaldy.
