Ornyqty damýdyń eń basty kepili - turaqtylyq – QR Prezıdenti

NUR-SULTAN. QazAqparat – Ornyqty damýdyń eń basty kepili - turaqtylyq. Bul týraly Qazaqstan halqy Assambleıasynyń «El birligi – jańarǵan Qazaqstannyń tiregi» atty HHHІ sessııasynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Sóz sóılegender bizdegi saıası ózgerister halqymyzdy uıystyryp, azamattarymyzdyń birtutastyǵyna jańa serpin bergenin aıtty. Bul - zańdy qubylys. Sebebi osy ózgerister demokratııalyq qundylyqtardy nyǵaıtýǵa baǵyttalǵan. Sondaı-aq jańa saıası mádenıet qalyptastyrýdy kózdeıdi. Azamattardy belsendi ári jasampaz bolýǵa shaqyrady. Degenmen, biz myna nárseni umytpaýymyz kerek. Ornyqty damýdyń eń basty kepili - turaqtylyq. Bul tujyrym Assambleıada talaı ret aıtyldy. Onyń durystyǵyn qazirgi tarıhymyz dáleldep otyr», - dep atap ótti Memleket basshysy.

Buǵan deıin Qazaqstan Prezıdenti Qasym-Jomart Toqaevtyń tóraǵalyǵymen Qazaqstan halqy Assambleıasynyń kezekti otyz birinshi sessııasy ashylǵanyn habarlaǵan edik.