Ornyqty damý maqsattarynyń ulttyq ındıkatorlarynyń jańartylǵan tizbesi bekitildi
ASTANA. KAZINFORM – Premer-mınıstrdiń orynbasary — ulttyq ekonomıka mınıstri Nurlan Baıbazarov ortalyq memlekettik organdar basshylyǵy men BUU, BUUDB jáne Eýropalyq odaq ókilderiniń qatysýymen Ornyqty damý maqsattary jónindegi úılestirý keńesiniń 8-otyrysyn ótkizdi, dep habarlaıdy
Nurlan Baıbazarov áriptestik pen tıimdi ózara is-qımyl ornyqty damý maqsattaryn iske asyrý úshin mańyzdy ról atqaratynyna toqtaldy.
«Ótken jyldyń qyrkúıek aıynda Memleket basshysy Qasym-Jomart Toqaev Ornyqty damý salasyndaǵy maqsattar boıynsha BUU sammıtine qatysty. Prezıdent óz sózinde ODM-ǵa qol jetkizý biz úshin ulttyq basymdyq bolyp sanalatynyn atap kórsetti. Sondyqtan biz árqashan yntymaqtastyq úshin ashyqpyz jáne halyqaralyq seriktesterimizdiń qoldaýyn joǵary baǵalaımyz», — dep atap ótti vıtse-premer.
Sondaı-aq Nurlan Baıbazarov Ornyqty damý maqsattarynyń qaǵıdattaryn engizý halyqtyń ómir súrý sapasyn arttyrýǵa, úzdik halyqaralyq standarttardy qabyldaýǵa, elimizdiń halyqaralyq ımıdjin arttyrýǵa baǵyttalǵanyn aıtty.
Jıyn barysynda sóz alǵan sheteldik áriptester respýblıkada júrgizilip jatqan reformalarǵa qoldaý bildirip, áleýmettik-ekonomıkalyq salanyń negizgi baǵyttaryn odan ári damytý jónindegi usynystaryn jetkizdi.
Talqylaý qorytyndysy boıynsha Úılestirý keńesi BUU-nyń Ornyqty damý salasyndaǵy kún tártibiniń 2030 jylǵa deıingi Ornyqty damý maqsattarynyń ulttyq ındıkatorlarynyń jańartylǵan tizbesin bekitti jáne 2025 jylǵy Erikti ulttyq sholýdy daıyndaý josparyn maquldady.
Aıta keteıik, Ornyqty damý maqsattaryn 2015 jyly Birikken Ulttar Uıymy kedeılik pen teńsizdikti joıýǵa, qorshaǵan ortany qorǵaýǵa jáne álem halqynyń ál-aýqatyn qamtamasyz etýge baǵyttalǵan jahandyq is-áreketke shaqyrý retinde qabyldady. Barlyǵy 17 baǵyt belgilendi, olardy júzege asyrý ekonomıka men áleýmettik ómirdiń negizgi baǵyttaryn damytýǵa múmkindik beredi. ODM-ǵa qol jetkizý monıtorıngi BUU men QR Úkimeti ókilderiniń turaqty baqylaýynda.
Buǵan deıin QR Prezıdenti janyndaǵy Sheteldik ınvestorlar keńesiniń 36-shy plenarlyq otyrysynda Nurlan Baıbazarov jyl sońyna deıin 4,7 mlrd dollardyń 239 jobasy iske qosylatynyn málim etti.
