Ormýzdyń jabylýynan Azııa elderi otyn únemdeýge kóshti
ASTANA. KAZINFORM - Shrı-Lanka memlekettik mekemeler úshin ár sársenbini jumys istemeıtin kún dep jarııalady. Bul sheshim Ormýz buǵazy jabylyp, AQSh pen Izraıldiń Iranǵa qarsy soǵysy bastalǵannan keıin energııa tasymaldaýshylar baǵasynyń ósýine baılanysty janarmaıdy únemdeý maqsatynda qabyldandy.
Bul týraly BBC-ge silteme jasap Armenpress habarlady.
- Bizge kez kelgen qıyndyqqa daıyn bolý kerek, jaqsydan da kúder úzbegen jón», - dedi prezıdent Anýra Kýmara Dıssanaıake joǵary laýazymdy sheneýniktermen ótken shuǵyl keńeste.
Azııanyń birqatar eli janarmaıdy únemdeý úshin túrli sharalar qabyldap jatyr.
Máselen, Taıland úkimeti aýa baptaǵysh qurylǵylardy az paıdalaný úshin turǵyndarǵa klassıkalyq kostıýmderdiń ornyna qysqa jeńdi jeıde kııýge keńes berdi. Mıanmada jeke avtokólikterdiń qozǵalysy memlekettik tirkeý nómirine qaraı kezekpen shekteldi.
Bangladeshde ýnıversıtetter úshin Ramazan kezindegi demalys merzimi erterek belgilenip, elektr energııasyn únemdeý úshin jaryq josparmen beriledi.
Fılıppınde keıbir memlekettik mekemeler qyzmetkerlerine aptasyna keminde bir kún qashyqtan jumys isteý mindetteldi. Sonymen qatar prezıdent Ferdınand Markos kishi memlekettik sektorda asa qajet emes issaparlarǵa tyıym saldy.
Vetnam bıligi azamattardy janarmaıdy únemdeý úshin úıde kóbirek bolýǵa shaqyryp otyr. Úkimet sondaı-aq velosıped tebýdi, kólikti birge paıdalanýdy, qoǵamdyq kólikti tańdaýdy jáne jeke avtokólikti qajet bolmaǵan jaǵdaıda qoldanbaýdy usyndy.
Ormýz buǵazy arqyly álemdik munaı qorynyń shamamen 20 paıyzy tasymaldanady. 2025 jylǵa qaraı bul buǵaz arqyly ótetin munaı men gazdyń 90 paıyzǵa jýyǵy munaıdy eń kóp ımporttaıtyn aımaq — Azııaǵa baǵyttalmaq.
Aıta keteıik, Ormýz buǵazyndaǵy júk tasymaly 90%-ǵa tómendedi.
Al Iran Ormýz buǵazyn ashpaımyz dep otyr.
