Ormýzdyń buǵattalýy: Saýd Arbııasy munaı jetkizetin balama baǵytty jandandyrmaq
ASTANA. KAZINFORM - Iran Ormýz buǵazyn áli ashqan joq. Osyǵan qaraı munaı baǵasy da ósip barady. Alaıda Saýd Arabııasynda munaı jetkizetin balama baǵyt bar. Osy arqyly saýdııalyqtar Ormýz buǵazyn joıý saldarynan qalyptasqan jaǵdaıdy jumsartýǵa tyryspaq, dep jazady Bild.
Bloomberg agenttiginiń málimetinshe, shyǵys-batys baǵytyndaǵy «Petroline» qubyry qazir bar qýatynda jumys istep tur.
Bloomberg deregine sáıkes, shól arqyly tartylǵan alyp qubyrmen táýligine shamamen jeti mıllıon barrel munaı aıdalady. Memlekettik munaı kompanııasy Aramco bul máseleni túsindirýden bas tartty. Degenmen naýryz aıynyń basynda kompanııa basshysy Amın Nasser qubyr jaqyn arada tolyq júktememen jumys isteıtinin málimdegen edi.
Uzyndyǵy shamamen 1200 shaqyrymǵa sozylatyn bul qubyrdyń mańyzyn asyra baǵalaý qıyn. Ol Parsy shyǵanaǵyna jaqyn ken oryndarynan munaıdy tikeleı Qyzyl teńiz jaǵalaýyndaǵy ıAnbý portyna jetkizedi. Sala sarapshylary ony «Ormýz buǵazyn aınalyp ótetin sheshýshi kólik dálizi» dep ataıdy. Saýd Arabııasy bul qubyrdy dál osyndaı daǵdarys jaǵdaıyna arnap, 1981 jyly salǵan. Ol kezde Iran men Irak arasynda soǵys júrip jatqan.
2008–2012 jyldary Birikken Arab Ámirlikteri de ınfraqurylymdy kúsheıtip, Abý-Dabı shıki munaı qubyryn iske qosty. Alaıda ol Ormýz buǵazynyń jabylýyn tek ishinara ǵana óteı alady, sondyqtan tolyqqandy balama bola almaıdy.
Qubyr jelileriniń taǵy bir osal tusy – olardyń ınfraqurylymynyń qorǵansyzdyǵy. Buǵan deıin saýdııalyq qubyr dron shabýyldaryna ushyraǵan, al mundaı qaýip qaıta qaıtalanýy múmkin.
Osyǵan deıin jazǵanymyzdaı, Starmer men Tramp Ormýz buǵazyn ashýdyń mańyzdylyǵyn moıyndady.
