Ormýzdaǵy shıelenis: 400 keme men 6 myń teńizshi Parsy shyǵanaǵynan shyǵa almaı otyr
ASTANA. KAZINFORM – Taıaý Shyǵystaǵy shıeleniske baılanysty 400 kemedegi 6 myńǵa jýyq teńizshi Parsy shyǵanaǵynan shyǵa almaı otyr, dep habarlaıdy Qatar News Agency.
Bul týraly BUU janyndaǵy Halyqaralyq teńiz uıymynyń (IMO) bas hatshysy Arsenıo Domınges málimdedi.
– Aımaqtaǵy myńdaǵan teńizshi áli de joǵary qaýip pen belgisizdik jaǵdaıynda ómir súrip, jumys istep jatyr. Keıbir kemeler men olardyń ekıpajdary Parsy shyǵanaǵynan shyǵa alǵanymen, qaqtyǵys bastalǵaly bortynda 6 myńǵa jýyq teńizshisi bar 400-ge jýyq keme shyǵanaqtan qaýipsiz shyǵa almaı otyr, – dedi Domınges.
Halyqaralyq teńiz uıymynyń málimetinshe, qaqtyǵys bastalǵaly halyqaralyq keme qatynasyna keminde 70 shabýyl jasalyp, 19 teńizshi qaza tapqan. Domınges Ormýz buǵazy arqyly erkin keme qatynasyn qalpyna keltirý úshin praktıkalyq sheshim tabýǵa shaqyrdy.
Ol qaqtyǵys saldarynan janarmaı, tyńaıtqysh jáne basqa da taýarlardy jetkizý tizbeginde áli de irkilis bar ekenin atap ótti. Bul álem elderiniń ekonomıkasyna áser etip otyr.
Tegeran AQSh shilde aıynda Iranǵa shabýyl jasap, 2026 jylǵy maýsymda qol qoıylǵan qaqtyǵysty toqtatý týraly memorandýmnyń endi kúshinde emes ekenin málimdegennen keıin Ormýz buǵazyn keme qatynasy úshin japty.
Iran Ormýz buǵazyn qaıta ashýdyń sharty retinde Vashıngtonnyń memorandým talaptaryn oryndaýǵa qaıta oralýyn talap etip otyr. Al AQSh buǵaz keme qatynasy úshin ashyq dep esepteıdi.
Aıta keteıik, buǵan deıin Tramptyń Ormýz buǵazyndaǵy mınalardy tolyq tazartqanyn málimdegenin jazdyq.
