Ormýz buǵazynda brıtan munaı tankeri ustaldy
TEGERAN. QazAqparat – Ormýz buǵazynda Islam Respýblıkasy saqshylarynyń korpýsy halyqaralyq teńiz erejelerin buzǵany úshin brıtandyq tankerdiń ustalǵanyn habarlady, dep habarlaıdy QazAqparat IRNA agenttigine silteme jasap.
Brıtanııalyq Stena Impero munaı tankeri juma kúni túnde Hormozgan provıntsııasynyń aılaq jáne teńiz uıymynyń ótinishimen ustalǵan. Oǵan halyqaralyq teńiz erejelerin buzdy degen aıyp taǵylyp otyr.
«Tıisti tekserýlerdi júrgizý úshin tanker jaǵalaýǵa jetkizildi» delingen habarlamada.
BBC málimetinshe, Stena Impero tankeri shvetsııalyq Stena Bulk kompanııasyna tıesili. Ol Saýd Arabııasyna bet alǵan. Bortynda ekıpajdyń 23 múshesi bar.
Odan bólek, Lıberııa týyn qadap alǵan taǵy bir keme ustalǵan. Degenmen, ırandyqtar Mesdar kemesindegi ekıpajǵa qaýipsizdik týraly túsindirgen soń qoıa bergen.
«Men Iran bıliginiń eki kemeni ustaǵanyn estip, qatty ýaıymdap otyrmyn», - dep málim etti Ulybrıtanııa ishki ister mınıstri Djeremı Hant.
Ol tótenshe jaǵdaılar jónindegi úkimettik komıtettiń otyrysynda (COBRA) osy jaǵdaıdy talqylaıtynyn aıtty.
Iran tóńiregindegi jaǵdaı 13 maýsym kúni Oman shyǵanaǵynda eki tankerge shabýyldan keıin jarylys pen órt tutanǵanda ýshyǵa bastaǵan. AQSh bul jaǵdaıǵa jaýapkershilikti Iranǵa artty, ony Ulybrıtanııa men Saýd Arabııasy qoldady. Tegeran bul aıyptaýdy joqqa shyǵardy.
