Ormýz buǵazynyń ońtústiginde eki munaı tankerinde jarylys boldy

ASTANA. KAZINFORM — Iran Islam revolıýtsııasy saqshylar korpýsynyń (KSIR) áskerı-teńiz kúshteri túngi ýaqytta Ormýz buǵazynyń ońtústiginde eki munaı tankeri teńiz mınalaryna soǵylyp, jarylǵanyn jáne órtengenin málimdedi. Bul týraly Anadoly jazdy.

Iran Ormýz buǵazynda AQSh-tyń barlaý dronyn qolǵa túsirgenin málimdedi
Foto: Anadoly

KSIR áskerı-teńiz kúshteriniń habarlamasynda tankerler Ormýz buǵazynan tyıym salynǵan baǵytpen jasyryn ótýge tyrysyp, navıgatsııalyq júıeleri men avtomatty sáıkestendirý júıesin (AIS) óshirip qoıǵany aıtylǵan.

Málimdemege sáıkes, teńiz mınalaryna soǵylǵan tankerler jarylyp, keıin qatty órt shyqqan.

Sondaı-aq buǵazdan jasyryn ótpek bolǵan taǵy eki munaı tankeri KSIR áskerı-teńiz kúshteriniń Ormýz buǵazyndaǵy keme qozǵalysyn basqarý ortalyǵynyń eskertýine qulaq asyp, Parsy shyǵanaǵyna qaraı keri burylǵany habarlandy.

Iran AQSh 8 shildede shabýyldaryn qaıta bastaǵannan keıin, 12 shildede Ormýz buǵazyn qaıta japqan.

Tegeran bıligi ózi belgilegen baǵytpen júrmeıtin jáne buǵazdan «ruqsatsyz» ótetin kemelerge soqqy beretinin eskertken.

KSIR Bahreındegi AQSh áýe qorǵanysy júıesiniń radaryna drondarmen shabýyl jasalǵanyn málimdedi

Iran Islam revolıýtsııasy saqshylar korpýsy (KSIR) Bahreındegi Ál-Rıfaa tikushaq bazasynda ornalasqan AQSh áýe qorǵanysy júıesiniń radıolokatsııalyq stantsııasyna alty ushqyshsyz ushý apparatymen (dron) shabýyl jasalǵanyn málimdedi.

KSIR habarlamasynda korpýstyń Áýe-ǵarysh kúshteri alty dron arqyly Bahreındegi Ál-Rıfaa tikushaq bazasynda ornalasqan amerıkalyq áýe qorǵanysy júıesiniń radaryna soqqy bergeni aıtylǵan. Korpýs bul shabýyldy AQSh armııasynyń shabýylyna jaýap retinde jasalǵan árekettiń ekinshi kezeńi dep atady.

Málimdemede drondardyń nysanaǵa dál tıgeni aıtylǵan. Sondaı-aq shabýyl dybystary Bahreınniń birneshe aýdanynda estilgeni habarlandy.

Buǵan deıin Bahreın Іshki ister mınıstrligi qaýip týraly eskertýge baılanysty turǵyndardy jaqyn mańdaǵy qaýipsiz jerge barýǵa shaqyrǵan. Alaıda vedomstvo habarlamasynda qaýiptiń naqty sıpaty kórsetilmegen.

KSIR buǵan deıin jarııalaǵan málimdemesinde Sırık qalasyna jasalǵan shabýylǵa jaýap retinde Bahreındegi AQSh-tyń erte eskertý radaryna soqqy berilip, onyń joıylǵanyn habarlaǵan edi.

Buǵan deıin Iran Ormýz buǵazynda munaı tankeri órtengenin habarlady.