Ormýz buǵazyndaǵy tranzıt «eki dálizdi júıege» kóshti

ASTANA. KAZINFORM – Ormýz buǵazy arqyly teńiz tranzıti «eki dálizdi júıege» kóshti. Jańa júıe Irannyń Islam revolıýtsııasy saqshylar korpýsy (KSIR) baqylaýyndaǵy soltústik baǵyt pen Oman jaǵalaýy boıymen ótetin jańa ońtústik baǵytty biriktiredi, dep habarlaıdy Sınhýa agenttigi.

Londonda ornalasqan teńiz tasymaly salasyndaǵy Windward taldaý kompanııasynyń málimetinshe, 5 sáýirde buǵaz arqyly 11 keme ótken. Onyń úsheýi kirgen, segizi shyqqan.

Kirgen kemelerdiń barlyǵy tankerler bolǵan. Al shyǵyp bara jatqan kemelerdiń arasynda tankerler de, júk kemeleri de bar.

Shyǵatyn baǵyttaǵy kemeler eki dálizge bólingen. Bes keme Larak araly mańyndaǵy soltústik dálizben ótken. Bul baǵyt burynǵydaı KSIR baqylaýynda qalyp otyr. Taǵy úsh keme Oman jaǵalaýy boıymen ótetin ońtústik dálizdi paıdalanǵan.

Sarapshylardyń esebinde soltústik marshrýttyń Larak araly mańyndaǵy ortalyq arqyly jumysyn jalǵastyryp otyrǵany atap ótilgen. Sonymen birge ońtústik dálizdiń iske qosylýy kemelerdiń burynǵy baqylaý aımaǵynan tys júrýine múmkindik berip otyr.

Málimetke sáıkes, ońtústik baǵyt alǵash ret 2 sáýirde paıdalanylǵan. Sol kúni bul jolmen úsh keme, onyń ishinde eki asa iri munaı tankeri men bir suıytylǵan tabıǵı gaz tasymaldaıtyn keme ótken.

Bul – áskerı qımyldar bastalǵaly beri suıytylǵan tabıǵı gaz tasıtyn kemeniń Ormýz buǵazy arqyly alǵash ret ótýi.

3–5 sáýir aralyǵynda ońtústik dálizdi paıdalanǵan kemeler sany tıisinshe eki, tórt jáne úsh bolǵan. Bul jańa marshrýttyń qysqa ýaqyt ishinde balama joldan tolyqqandy dálizge aınalyp kele jatqanyn ańǵartady.

Ormýz buǵazy – álemdik energetıkalyq resýrstar jetkizilimindegi mańyzdy toraptardyń biri.

Eske salsaq, 28 aqpanda AQSh pen Izraıl Iranǵa aýqymdy soqqy jasaǵannan keıin, Tegeran óńirge jaýap soqqylaryn bergen edi. Osydan soń buǵazdaǵy keme qatynasy kúrt toqtatyldy.

Qazirgi tańda Ormýz buǵazy arqyly keme qatynasy 90%-ǵa qysqardy. 

Jýyrda Bloomberg basylymy Irak munaıyn tıegen tanker Ormýz buǵazynan ótkenin habarlady.