Ormýz buǵazyndaǵy shıelenis munaı baǵasynyń ósýine áser etti
ASTANA. KAZINFORM — Juma kúni álemdik naryqta munaı baǵasy ósti. Buǵan AQSh pen Iran arasyndaǵy kelissózderdiń sozylyp ketýi jáne Ormýz buǵazy arqyly munaı tasymalyna qatysty táýekelderdiń kúsheıýi sebep boldy. Bul týraly Reuters agenttigi jazdy.
Brent markaly munaıdyń baǵasy 84 tsent ósip, barreline 83,33 dollarǵa jetti. Al WTI markaly munaı 89 tsent qymbattap, barreliniń baǵasy 78,18 dollar boldy.
AQSh-taǵy eńbek naryǵyna qatysty jańa málimetter de munaı baǵasynyń ósýine áser etti. Shilde aıynda elde 23 myń jumys orny qysqarǵan. Bul AQSh Federaldy rezervtik júıesiniń paıyzdyq mólsherlemeni odan ári kóterý yqtımaldyǵyna qatysty naryqtaǵy boljamdardy álsiretti. Al aqsha-nesıe saıasatynyń jumsarýy, ádette, janarmaıǵa degen suranystyń artýyna yqpal etedi.
Munaı naryǵyna Ormýz buǵazyndaǵy ahýal da áser etip otyr. Iranda amerıkalyq jáne ızraıldik kemelerdiń buǵaz arqyly ótýin shekteý, sondaı-aq tranzıttik alym engizý múmkindigi talqylanyp jatyr. Alaıda AQSh bıligi mundaı tólemderge qarsylyq bildirip otyr.
Eske salaıyq, buǵan deıin álemdik munaı baǵasy Iran tóńiregindegi shıelenis pen shıkizat jetkizilimine qatysty qaýipterdiń kúsheıýine baılanysty 1%-dan astam óskenin habarlaǵan edik.
6 tamyzdaǵy keshki jaǵdaı boıynsha Brent markaly munaıdyń qazan aıyndaǵy fıýchersteri 1,04% ósip, barreli 80,28 dollar boldy. Al amerıkalyq WTI munaıy 0,81% qymbattap, barreli 75,83 dollarǵa jetti.
