Ormýz buǵazyndaǵy shıelenis: munaı baǵasy barreline 150 dollarǵa barýy múmkin

ASTANA. KAZINFORM — AQSh pen Izraıldiń Iranǵa jasaǵan shabýyldarynan keıin naryqtarda jetkizilimderdiń qysqarý stsenarııleri talqylanyp jatyr. Sarapshylar munaı baǵasy barreline 85–150 dollarǵa deıin kóterilýi múmkin ekenin boljap otyr. Bul týraly Anadolý agenttigi jazdy.

AQSh-tyń Energetıkalyq aqparat basqarmasynyń (EIA) derekterine sáıkes, Saýd Arabııasy men Birikken Arab Ámirlikteri arqyly ótetin qubyr jelileri táýligine shamamen 3,5 mln barrel balamaly ótkizý múmkindigin qamtamasyz etedi.

Sonymen qatar AQSh-tyń strategııalyq munaı qory 415 mln barreldi quraıtyny atap ótildi. Ormýz buǵazy arqyly jetkizilimderdiń uzaq merzimge toqtaýy kúrt aýytqýlarǵa ákelýi múmkin, ásirese Azııadaǵy munaı óńdeý zaýyttarynyń marjasyna jáne fraht baǵalaryna áser etedi.

Sarapshylardyń pikirinshe, munaı rezervteri yqtımal jetkizilim qysqarýyn tolyq óteýge jetkiliksiz bolýy múmkin. Olar munaı baǵasy barreline 85–150 dollarǵa deıin ósýi yqtımal dep boljaıdy.

Japonııa munaı ımportynyń shamamen 72%-yn Ormýz buǵazy arqyly alady

Sonymen qatar strategııalyq teńiz ótkelderiniń biri — Ormýz buǵazyna elderdiń táýeldilik deńgeıi de nazar aýdartady. Bul buǵaz arqyly kún saıyn shamamen 20 mıllıon barrel munaı men munaı ónimderi tasymaldanady.

Osy derekterge sáıkes, Japonııa munaı ımportynyń shamamen 72%-yn Ormýz buǵazy arqyly jetkizedi, al Ońtústik Koreıada bul kórsetkish 65%-dy quraıdy.

Azııanyń iri ekonomıkalary — Qytaı men Úndistan úshin Ormýz buǵazy arqyly ótetin baǵytqa táýeldilik shamamen 50%-ǵa teń.

Eýropada ortasha táýeldilik deńgeıi 18% bolsa, AQSh-tyń Ormýz buǵazy arqyly ótetin jetkizilimderge táýeldiligi shamamen 2% deńgeıinde baǵalanady.

Eske sala ketsek, buǵan deıin Iran Ormýz buǵazy arqyly ótýge tyrysqan kez kelgen kemeni atatynyn málimdedi.

Al munaı baǵasy barreline 100 dollarǵa deıin kóterilýi múmkin.

Sondaı-aq Qazaqstan jáne OPEK+ uıymyna múshe basqa jeti el sáýirden bastap munaı óndirisin arttyrady.