Ormýz buǵazyndaǵy Iran men AQSh kúshteri arasyndaǵy qaqtyǵystar toqtady
ASTANA. KAZINFORM – Ormýz buǵazynda Iran qarýly kúshteri men AQSh áskerı kúshteri arasyndaǵy oqtyn-oqtyn bolǵan qaqtyǵystar toqtady. Alaıda olardyń qaıta jalǵasý yqtımaldyǵy saqtalyp otyr. Bul týraly ırandyq Tasnim agenttigi habarlady.
Agenttik málimetinshe, Iran qarýly kúshteri AQSh áskerı-teńiz kúshteriniń kemeleri Parsy shyǵanaǵyna kirýge nemese ırandyq kemelerdi qýdalaýǵa áreket jasaǵan jaǵdaıda jaýap sharalaryn qabyldaıdy.
Irannyń Fars News Agency agenttigi buǵan deıin sońǵy saǵattarda Ormýz buǵazynda Iran qarýly kúshteri men amerıkalyq áskerı kemeler arasynda jekelegen qaqtyǵystar bolǵanyn habarlaǵan.
Málimetke sáıkes, AQSh-tyń Iran munaı tankerine jasaǵan shabýylynan keıin Iran áskerı-teńiz kúshteri aımaqtaǵy amerıkalyq áskerı kemelerge zymyrandar men kamıkadze-drondar arqyly soqqy jasaǵan. Buǵan jaýap retinde amerıkalyq kúshter Irannyń ońtústik jaǵalaýyndaǵy porttarǵa shabýyl jasaǵan.
Iran AQSh-ty azamattyq nysandarǵa soqqy jasady dep aıyptady. Tegeran málimetinshe, azamattyq kemege jasalǵan shabýyl saldarynan bir adam qaza taýyp, taǵy on adam jaralanǵan. Sonymen qatar tórt adamnyń iz-túzsiz joǵalǵany habarlandy.
Óz kezeginde AQSh Qarýly kúshteri ortalyq qolbasshylyǵy – CENTCOM Iran «eshqandaı arandatýsyz» Ormýz buǵazy arqyly ótip bara jatqan AQSh áskerı-teńiz kúshteriniń kemelerine shabýyl jasaǵanyn málimdedi. Al amerıkalyq tarap «ózin-ózi qorǵaý maqsatynda» jaýap qaıtarǵanyn aıtty.
Keıinirek Iran sheteldik munaı tankerin ustaǵanyn habarlady. Tegerannyń málimdeýinshe, keme aımaqtaǵy jaǵdaıdy Iran munaıynyń eksportyna zııan keltirý maqsatynda paıdalanýǵa tyrysqan.
Aıta keteıik, keshe AQSh Irannyń eki portyna shabýyl jasaǵanyn habarladyq.
