Ormýz buǵazynda taǵy bir munaı tankeri mınaǵa soǵylyp, órtendi
ASTANA. KAZINFORM – Ormýz buǵazynyń ońtústik bóliginde iri munaı tankeri teńiz mınasyna soǵylyp, kemeniń qozǵaltqysh bóliminde jarylys boldy. Artynsha órt shyqqan. Bul týraly Irannyń IRNA agenttigi Islam revolıýtsııasy saqshylary korpýsy (IRSK) Áskerı-teńiz kúshteriniń resmı málimdemesine silteme jasap habarlady.
Iran áskerı qolbasshylyǵynyń málimetinshe, iri kólemde shıki munaı tasymaldaǵan tanker Ormýz buǵazynan shyǵýǵa árekettengen.
Alaıda keme halyqaralyq keme qatynasy erejelerin buzyp, avtomatty sáıkestendirý júıesin (AIS) jáne navıgatsııalyq datchıkterin tolyq óshirgen. Sonymen qatar belgilengen qaýipsiz baǵyttan aýytqyp, kemelerdiń júrýine tyıym salynǵan aımaqqa kirgen.
IRSK Áskerı-teńiz kúshteriniń málimdeýinshe, bul – sońǵy eki táýlikte belgilengen tártipti buzǵan tankerlerdiń mınaǵa soǵylýyna qatysty úshinshi oqıǵa.
Osyǵan baılanysty Iran tarapy Ormýz buǵazynda júzetin kemelerge qatań eskertý jasady.
– Buǵaz aýmaǵynda navıgatsııalyq derekterin jasyratyn kez kelgen keme avtomatty túrde dushpandyq nysan retinde qarastyrylady. Mundaı jaǵdaıda oǵan qatysty barlyq qajetti yqpal etý sharalary qoldanylady, – delingen IRSK Áskerı-teńiz kúshteriniń málimdemesinde.
Oqıǵa álemdik munaı tasymaly úshin strategııalyq mańyzy bar Ormýz buǵazynda qaýipsizdikke qatysty táýekelder kúsheıgen tusta tirkeldi.
Aqparat jarııalanǵan sátte AQSh Qarýly kúshteri Ortalyq qolbasshylyǵy (CENTCOM), halyqaralyq teńiz qaýipsizdigi organdary jáne tankerdi paıdalanýshy kompanııa bul jaǵdaıǵa qatysty túsinikteme bermegen.
Sondaı-aq tankerdiń qaı elge tıesili ekeni, ekıpaj músheleriniń jaǵdaıy jáne teńizge munaı tógilý qaýpi týraly naqty aqparat joq.
Oqıǵaǵa qatysty málimetter ázirge Iran tarapynyń málimdemesine negizdelgen. Basqa derekkózder tarapynan táýelsiz rastaý jarııalanǵan joq.
Aıta keteıik, buǵan deıin 24 qyrkúıekte Ormýz buǵazynda júk kemesine shabýyl jasalyp, ekıpajdyń eki múshesi qaza tapqan bolatyn. Shabýyldan keıin kemede órt shyqqan.
