Ormýz buǵazynda AQSh blokadasyna qaramastan keme qatynasy jalǵasyp jatyr
ASTANA. KAZINFORM — AQSh engizgen áskerı-teńiz blokadasyna qaramastan, Ormýz buǵazy arqyly kemeler qozǵalysy jalǵasyp jatyr, dep habarlaıdy Kazinform-nyń Taıaý Shyǵystaǵy menshikti tilshisi.
Reuters jáne salalyq derekkózderdiń málimetinshe, shekteýler engizilgen alǵashqy táýlikte keminde 8 keme, onyń ishinde Iranmen baılanysty 3 tanker buǵazdan ótken. Olardyń bir bóligi ırandyq emes porttarǵa baǵyt alǵan jáne blokada talaptaryna ilikpegen.
Sonymen qatar, jalpy trafık kólemi aıtarlyqtaı tómendegen. Buǵan deıin buǵaz arqyly táýligine 130-dan astam keme ótse, qazirgi kórsetkish odan áldeqaıda az.
AQSh sanktsııalaryna ilikken keıbir kemeler de qozǵalysyn jalǵastyryp jatyr. Irannyń Fars agenttiginiń habarlaýynsha, 2 mln barrelge deıin munaı tasymaldaı alatyn sýpertanker buǵazdan ótip, Imam Homeını portyna baǵyt alǵan. Keme ashyq túrde, marshrýtty jasyrmaı jáne navıgatsııalyq júıesin óshirmeı júrgeni atap ótildi.
AQSh tarapy blokadanyń oryndalýyn qamtamasyz etip jatqanyn málimdedi. The Wall Street Journal basylymyna silteme jasaǵan amerıkalyq sheneýnikterdiń aıtýynsha, operatsııa bastalǵaly beri Iranmen baılanysty keminde 8 tanker baǵytyn ózgertip, Iran porttaryna qaıtarylǵan.
Basylym málimetinshe, blokadany júzege asyrýǵa 15-ten astam áskerı keme men myńdaǵan amerıkalyq áskerı qyzmetker tartylǵan. Olardyń qatarynda teńiz jaıaý áskerleri men arnaıy operatsııa kúshteri bar.
Associated Press dereginshe, AQSh strategııasy — Iran porttarynan shyqqan kemelerdi baqylap, keıin Oman shyǵanaǵynda toqtatyp, keri burý. Bul rette avtomatty sáıkestendirý júıelerimen qatar ózge de baqylaý quraldary qoldanylady.
Sarapshylar sońǵy kúnderi baqylaýdan jaltarý áreketteri artqanyn aıtady. Keıbir kemeler transponderlerin óshirip nemese jalǵan sıgnaldar qoldana bastaǵan.
AQSh Ortalyq qolbasshylyǵy blokada tolyq iske asyrylǵanyn jáne Irannyń teńiz saýdasyna eleýli áser etkenin málimdedi.
Al Iran tarapy blokadanyń tıimdiligin joqqa shyǵaryp otyr. Resmı ókilder eldiń Parsy shyǵanaǵy, Oman teńizi jáne Ormýz buǵazyndaǵy keme qatynasynyń qaýipsizdigin qamtamasyz ete alatynyn jetkizdi.
Aımaqtaǵy jaǵdaı aıasynda keme qatynasy kompanııalary men saqtandyrý naryǵynda belgisizdik saqtalyp otyr. Áskerı táýekelderdi saqtandyrý quny joǵary deńgeıde qalyp, sarapshylar qalypty rejımge oralý jaqyn arada múmkin emes ekenin aıtady.
Eske sala keteıik, AQSh osy aptanyń basynda Iran porttaryna qatysty áskerı-teńiz blokadasyn bastaǵan edi. Sonymen qatar Iran men AQSh arasyndaǵy kelissózderdiń kelesi kezeńi osy apta sońyna deıin ótýi múmkin ekeni habarlanǵan.
