Ormýz buǵazynan ótken krýızdik laınerler Eýropaǵa bet aldy
ASTANA. KAZINFORM — Iran qatysqan soǵys pen Ormýz buǵazynyń jabylýy saldarynan bógelip qalǵan krýızdik laınerler endi buǵazdan ótip, Eýropaǵa qaraı baǵyt aldy, dep habarlaıdy Euronews.
TUI Cruises kompanııasy Mein Schiff 4 jáne Mein Schiff 5 laınerleri Parsy shyǵanaǵynan sátti shyqqannan keıin mamyr aıyna josparlanǵan baǵyt «jospar boıynsha oryndalýy múmkin» ekenin málimdedi.
Iran qatysqan qaqtyǵysqa baılanysty Ormýz buǵazy jabylǵan soń, birneshe krýızdik keme Parsy shyǵanaǵyndaǵy mańyzdy porttarda qalyp qoıǵan edi.
Juma kúni Malta týy astyndaǵy Celestyal Discovery jolaýshylar laıneri Dýbaıdan shyǵyp, soǵys bastalǵaly beri buǵazdan ótken alǵashqy krýızdik keme boldy. Celestyal Cruises kompanııasynyń málimetinshe, taǵy bir laıner — Celestyal Journey — Katar astanasy Dohadan shyǵyp, eki kemeniń de osy sý jolynan «sátti ári qaýipsiz ótkenin» rastady.
Kompanııa habarlaýynsha, Celestyal Discovery men Celestyal Journey endi Jerorta teńizine baǵyt alyp, josparlanǵan jazǵy maýsymdy sol jerde bastaıdy. Sondaı-aq satylymdaǵy barlyq aldaǵy reıs kestege sáıkes júzege asatyny atap ótildi.
MSC Cruises kompanııasy da MSC Euribia laıneriniń Ormýz buǵazynan qaýipsiz ótip, Dýbaıdan shyqqanyn habarlady. Kompanııa málimetinshe, bul ótý tıisti organdarmen tyǵyz úılestirý arqyly júzege asqan.
MSC Euribia kemesi Soltústik Eýropaǵa bet alyp, jospar boıynsha 16 mamyrda Germanııanyń Kıl qalasynan, al 17 mamyrda Danııanyń Kopengagen qalasynan jolǵa shyǵady.
TUI Cruises jeksenbi kúni jarııalaǵan málimdemesinde Mein Schiff 4 jáne Mein Schiff 5 laınerleri Dýbaı men Dohadan shyqqannan keıin Jerorta teńizine qaraı baǵyt alǵanyn rastady. Kompanııanyń aıtýynsha, eki keme de aldymen Keıptaýnǵa bet alyp, keıin ádettegi baǵyttaryna qaıta oralady.
Osylaısha, buryn toqtatylǵan reıster de qaıta jandanady: Mein Schiff 4 laıneriniń 17 mamyrdan bastap Italııanyń Trıest qalasynan shyǵatyn saparlary jáne Mein Schiff 5 kemesiniń 15 mamyrdan bastap Grekııanyń Iraklıon qalasynan bastalatyn reısteri jospar boıynsha júzege asady.
TUI Cruises bas dırektory Vıbke Maıer sońǵy aptalar kompanııa úshin buryn-sońdy bolmaǵan synaq kezeńi bolǵanyn atap ótti. Ol kapıtandarǵa, ekıpajdarǵa jáne barlyq qyzmetkerlerge kásibıligi men janqııarlyǵy úshin alǵys bildirdi.
Onyń aıtýynsha, kompanııa endi qysqa merzim ishinde qalypty jumysqa qaıta oralyp, barlyq flotyn josparǵa saı iske qosa alady. Buryn toqtatylǵan krýızderdi qaıta usyna alýy kompanııanyń birligi men tıimdiligin kórsetedi.
Qazirgi ýaqytta Keıptaýn men Maltadaǵy ekıpajdar laınerlerge qosylyp, olardy qalypty rejımde jumysqa daıyndaýda. Al alǵashqy jolaýshylardy Trıest pen Iraklıon qalalarynda jospar boıynsha qabyldaý kózdelip otyr.
Aıta ketelik Iran Ormýz buǵazyn qaıta japty.
