Ormýz buǵazynan kommertsııalyq kemelerdi evakýatsııalaý bastaldy
ASTANA. KAZINFORM — Halyqaralyq teńiz uıymy (IMO) Ormýz buǵazynan kommertsııalyq kemelerdi shyǵarý boıynsha aýqymdy operatsııaǵa daıyndyqty bastady, dep habarlaıdy Birikken Ulttar Uıymynyń jańalyqtar qyzmeti.
Uıymnyń málimetinshe, bul shara Iran men AQSh arasyndaǵy qaqtyǵysty toqtatý jónindegi kelisimder aıasynda qolǵa alynýda. Eger jospar sátti júzege assa, buǵaz arqyly ótetin keme qozǵalysy soǵysqa deıingi deńgeıge qaıta oralýy múmkin, ıaǵnı sońǵy kúnderi táýligine 20–30 keme ǵana ótse, bolashaqta bul kórsetkish qaıtadan kúnine shamamen 130 kemege jetýi yqtımal.
— Agenttik operatsııany bastaý úshin jergilikti ókilderi arqyly kemelermen baılanys ornatyp jatyr. Operatsııaǵa 500-den 600-ge deıin kommertsııalyq keme qatysady dep josparlanyp otyr, — dep habarlady BUU.
IMO qajetti qaýipsizdik kepildikterin alǵanyn jáne kemelerdi shyǵarý úshin eki ýaqytsha teńiz dálizin belgilegenin málimdedi. Onyń biri Iran jaǵalaýy boıymen ótse, ekinshisi Oman men Birikken Arab Ámirlikteriniń aýmaqtyq sýlary arqyly júrgiziledi.
Kemelerge qozǵalysty bastaýǵa ruqsatty kútý jáne jaǵalaýdaǵy memleketterdiń nusqaýlaryn qatań saqtaý usynyldy. Árbir keme úshin dálizden ótý kúni jeke belgilenedi.
Halyqaralyq teńiz uıymynyń dereginshe, Ormýz buǵazy mańyndaǵy áskerı qaqtyǵystar bastalǵaly beri 14 teńizshi qaza tapqan. Sonymen qatar bul mańyzdy teńiz jolynyń qalypty jumysy aıtarlyqtaı buzylǵan.
— Myńdaǵan jazyqsyz teńizshiler úshin aýyr synaqqa aınalǵan jáne búkil álemge keri áserin tıgizgen birneshe aılyq qıyn kezeńnen keıin AQSh pen Iran arasyndaǵy beıbit kelisimdi zor qanaǵattanýshylyqpen quptaımyn. Bul teńizdegi qaýipsizdikti qalpyna keltirý jáne azamattyq kemelerge jasalǵan jol berýge bolmaıtyn shabýyldardy toqtatý jolyndaǵy sheshýshi qadam, — dedi IMO Bas hatshysy Arsenıo Domınges.
Buǵan deıin Oman Halyqaralyq teńiz uıymymen úılestire otyryp, Ormýz buǵazy arqyly ótetin ýaqytsha teńiz dálizin quratynyn jarııalaǵan bolatyn.
